Tesla Education-ge aldanǵan ata-analardyń máselesi Májiliste kóterildi
ASTANA. KAZINFORM — Májilistiń jalpy otyrysynda depýtat Nartaı Sársenǵalıev jeke menshik repetıtorlyq ortalyqtardyń jumysyn qatańdatýdy usyndy.
— Balalary kýrstarǵa barǵan jáne sol kýrstardan aqshasyn qaıtara almaı aldanyp qalǵan azamattardyń shaǵymy sebep bolyp otyr. Emtıhan, UBT sııaqty synaqtarǵa áleýmettik jaǵdaıy jetetin oqýshylar jappaı qosymsha kýrstar arqyly daıyndalady. Emtıhan suraqtaryn daıyndaıtyn azamattar mekteptegi bilim baǵdarlamasyn bilmegendikten, basqa suraq daıyndaı ma? Álde bilim baǵdarlamasynyń olqy tustary bar ma?
Kýrs ortalyqtaryna aldanyp jatqan azamattar bar. Sonyń biri — Tesla Education degen ortalyq, Ondaǵy júıesiz jumystyń kesirinen 3 myńǵa jýyq azamat aldanyp, 1 mlrd teńgeden astam qarajatyn qaıtara almaı júrgenin aıtyp dabyl qaǵyp jatyr. Osyndaı jeke menshik kýrs ortalyqtarynyń jumysyn júıeleý úshin ruqsat berý tetikterin qatańdatasyzdar ma, — dep surady Nartaı Sársenǵalıev.
Mınıstr jeke menshik kýrs pen ata-ana arasyndaǵy qarjylyq daý azamattyq qarym-qatynas sıpatyndaǵy másele ekenin atap ótti.
— Iá, Tesla Education-ge baılanysty másele qazirgi tańda ózekti. Mundaı qosymsha bilim berý uıymdarynyń jumysy Kásipkerlik kodeksiniń aıasynda retteledi. Oǵan Oqý-aǵartý mınıstrliginiń, jergilikti ákimdikterdiń eshqandaı qatysy joq. Bul ata-analar men jeke menshik repetıtorlyq ortalyqtar arasyndaǵy azamattyq quqyq qatynastar arqyly retteledi. Biraq másele oqýshylarmen tikeleı baılanysty bolǵandyqtan, ata-analardyń jan aıqaıyn estigendikten Bilim týraly zańǵa, Kásipkerlik kodeksine alaıaqtyqtyqty boldyrmaýǵa baılanysty zań normalaryn qatańdatý baǵytynda jumysty bastadyq, — dedi ol.
Mınıstr repetıtorlyq ortalyqtyń kómegine júginý azamattardyń konstıtýtsııalyq quqyǵy ekenin eske saldy.
— Bizde Ulttyq bilim berý derekter qory bar. Osy aqparat júıesi arqyly qosymsha bilim berý kýrstaryna baratyn balalardy, onyń ishinde jeke menshik ortalyqtarǵa baratyn balalardy baqylaý tetigin engizip jatyrmyz. Bul azamattardyń óziniń quqyǵy. Biz olarǵa repetıtorlyq ortalyqqa barma dep shekteı almaımyz. Repetıtorlyq ortalyqqa barý — azamattyń konstıtýtsııalyq quqyǵy. Dese de, mekteptegi bilim sapasyn arttyrý baǵytynda keshendi jumys bastadyq. Onyń ishinde qaı synypta, qaı pánde, qaı taqyrypta balalar qınalyp júrgenin anyqtap, muǵalimderdiń jumysynda qandaı aqaýlar bar, sonyń bárin saraptaýdy bastap kettik, — dedi Juldyz Súleımenova.
Buǵan deıin Astana polıtsııasy «Tesla Education» ortalyǵyna qatysty aryzdardy qaraýǵa kiriskenin jazǵan edik.