Tesla Education daýyna tap bolǵan balalar ózge bilim ortalyqtarynda tegin oqıdy
ASTANA. KAZINFORM - Eldegi jetekshi bilim berý ortalyqtary birlesip, ata-analar men oqýshylardyń máselesin sheshýge kelisti.
Májilis depýtaty Oljas Quspekov «Pıfagor», «JUZ40», «Samǵa», «Dostyq», «Zerdeli» jáne basqa da tanymal ortalyqtarmen onlaın-kezdesý ótkizdi.
Kezdesýde kóterilgen negizgi máseleler – Tesla Education tóńiregindegi jaǵdaıdan zardap shekken úsh myńnan astam oqýshy men ata-anany qalaı qorǵaýǵa bolatyny jáne mundaı oqıǵalardyń aldyn alý joldary.
Bilim ortalyqtary ortaq sheshimge kele aldy. Shyǵynǵa ushyraǵan otbasylardyń balalaryn ózara bólip, UBT-ǵa jáne basqa da pánder boıynsha tegin daıyndaýdy moınyna aldy. «Zerdeli», «Pıfagor» jáne «JUZ40» ortalyqtary buǵan daıyn ekenin rastady. Bar talap – ata-ananyń tólem jasaǵanyn dáleldeıtin túbirtek.
Sonymen qatar, máseleniń júıeli problemalary bar ekeni de aıtyldy. Alty aı, bir jyl buryn oqý úshin aldyn ala tólem alý bilim berý ortalyǵynyń ata-analar qarajatyn qaıtara almaýyna alyp kelgen negizgi sebep bolǵan.
Kezdesýde birneshe usynys kóterildi:
* uzaq merzimdi aldyn ala tólemdi zańmen shekteý;
* ár bilim ortalyǵynda mindetti ótemaqy qoryn qurý;
* sala ishinde ortaq standarttary bar ózin-ózi retteý júıesin qalyptastyrý.
-Qazir jekemenshik bilim berý salasynda naqty ereje joq. Rettteý joq, standart joq, ata-anany qorǵaıtyn tetik joq. Sondyqtan Tesla Education jaǵdaıy qaıtalanýy múmkin. Salany eki jol kútip tur: lıtsenzııalaý nemese ózin-ózi retteý. Ortalyqtar ata-anany da, óz bedelin de qorǵaý úshin ózin-ózi retteýge daıyn. Bizdiń mindet – usynystardy jınap, tıisti organdarǵa jetkizý, – dedi Májilis depýtaty Oljas Qupekov.
-Senim bildirgen ata-analarǵa da rızashylyq bildiremiz. Otbasylar men oqýshylardyń múddesin qorǵaıtyn júıeli sheshimderdi izdeý jolyn jalǵastyra beremiz,-delingen habarlamada.
Almatyda tanymal bilim berý ortalyǵyna qatysty qylmystyq is tergelip jatyr.
