Tesla Cybertruck saýdasy 2025 jyly 50% jýyq qysqardy

ASTANA. KAZINFORM – 2025 jyly Tesla Cybertruck elektrli pıkaptarynyń saýdasy 48% qysqardy, dep keltiredi Kelley Blue málimetterin CBS News.

Bir jyl ishinde kompanııa nebári 20 237 avtokólik ótkizse, 2024 jyly bul kórsetkish 38 965 bolǵan. Suranystyń tómendeýi Tesla-nyń ózge modelderin de aınalyp ótpedi: Model X, S jáne Y satylymy da quldyraǵan. Jalǵyz erekshelik – Model 3: bul modelge degen suranys 1,3 paıyzǵa ósip, 192 440 kólikke jetti.

Buǵan deıin Tesla bıznestegi qysymdy saýda, tarıf jáne fıskaldyq saıasatqa qatysty belgisizdikpen túsindirgen. Qıyndyqtarǵa qaramastan, kompanııa AQSh-taǵy elektromobıl naryǵynda shamamen 46 paıyzdyq úlespen áli de kóshbasshy bolyp otyr.

Sonymen qatar, 2025 jyly Tesla 1,64 mıllıon avtokólik jetkizýdi josparlap otyr, bul ótken jylmen salystyrǵanda 9 paıyzǵa az. Osylaısha, kompanııa jahandyq kóshbasshylyqty Qytaıdyń BYD brendine berip qoıǵan.

Cybertruck modeliniń bedeline jasalǵan taǵy bir soqqy kólikterdiń jappaı keri qaıtarylýymen baılanysty boldy. 2024 jyly Tesla sándik panel, artqy kórinis kamerasy, áınek tazalaǵyshtar men akselerator pedaline qatysty aqaýlarǵa baılanysty 46 myń pıkapty keri qaıtardy. Baǵasynyń qymbattyǵy (60 990 dollardan bastap) men tehnıkalyq kemshilikter aıasynda bul modelge degen suranys odan ári álsireı tústi.

Avtobıznesindegi qıyndyqtar kúsheıgen tusta, ınvestorlar endi adamtektes Optimus roboty jobasyna jıi kóz tige bastady.

Ilon Masktyń aıtýynsha, robottar qazirdiń ózinde Tesla zaýyttarynda qarapaıym jumystardy atqaryp júr, al olardyń kommertsııalyq satylymy aldaǵy jyldary bastalýy múmkin. Barclays sarapshylarynyń baǵalaýynsha, búginde adamtektes robototehnıka naryǵy 2–3 mlrd dollar shamasynda. Alaıda 2035 jylǵa qaraı bul kórsetkish 40–200 mlrd dollarǵa deıin ósýi yqtımal.

Osyǵan deıin 2025 jyly Tesla elektromobılder satylymynda qytaılyq BYD-den artta qalǵany týraly jazdyq.