Tesla aktsııalary eýropalyq satylym tómendegennen keıin arzandady
ASTANA. KAZINFORM – Qańtar aıynda Eýropalyq Odaq pen Ulybrıtanııadaǵy satylym eki esege derlik qysqarǵannan keıin Tesla elektromobıl óndirýshisiniń aktsııalary 9%-ǵa arzandady, dep habarlaıdy BBC.
Tesla aktsııalary baǵasynyń tómendeýi kompanııanyń qunyn 2024 jyldyń qarashasynan beri alǵash ret 1 trln dollardan tómen túsirdi. Amerıkalyq Tesla eýropalyq naryqta qytaılyq jáne basqa da avtoóndirýshilermen qatań básekelestikke tap bolyp otyr.
Eýropalyq avtomobıl óndirýshiler qaýymdastyǵynyń (Acea) málimetinshe, Tesla-nyń qańtardaǵy satylymy Eýropada bul aıda úshten birinen astamǵa ósken elektromobılder satylymynyń tendentsııasyn tómendetti.
Tesla-nyń EO, Eýropalyq erkin saýda qaýymdastyǵy elderi men Ulybrıtanııadaǵy satylymy 45%-ǵa, al tek EO-da 50%-ǵa tómendedi. Bul Tesla-nyń jalpy satylymy ótken jyly suranystyń álsireýi men básekelestiktiń kúsheıýine baılanysty 10 jyldan astam ýaqyt ishinde alǵash ret tómendegenimen baılanysty bolyp otyr.
AJ Bell ınvestıtsııalyq dırektory Rass Moýldtyń pikirinshe, qańtardaǵy satylymnyń tómendeýiniń negizgi faktory básekelestiktiń ósýi bolýy múmkin. Onyń aıtýynsha, qytaılyq BYD avtomobıl óndirýshisi, sonyń ishinde basqa avtomobıl óndirýshileri qosymsha aqy alatyn múmkindikterdi standart retinde qosý arqyly úlken jetistikterge jetti.
Alaıda atalǵan mamannyń pikirinshe, keıbir satyp alýshylar Masktyń saıası málimdemelerine baılanysty «prıntsıpti ustanymdy» qabyldaǵan bolýy múmkin.
Mask AQSh-ta federaldy qarjylandyrýdy kúrt qysqartýǵa kúsh salýymen nazar aýdartty. Ulybrıtanııada ol Tommı Robınson degen atpen belgili túrmedegi ońshyl belsendi Stıven ıAkslı-Lennondy qoldap, premer-mınıstr Keır Starmerdi birneshe ret synǵa aldy. Germanııada Mask ásire ońshyl «Germanııa úshin balama» (AfD) partııasyn qoldaıdy jáne onyń jetekshisin partııa úshin rekordtyq nátıje — saılaýdaǵy ekinshi ornymen quttyqtady.
Moýldtyń aıtýynsha, Tesla-nyń pozıtsııasyn álsiretetin basqa da saıası faktorlar bar.
Masktyń Donald Tramppen jaqyn qarym-qatynasynyń arqasynda AQSh-taǵy saılaýdan keıin kompanııanyń aktsııalary kúrt ósti. Ol ózin prezıdenttiń «birinshi dosy» (first buddy) dep atady.
Investorlar bul Tesla bıznesine paıda ákeledi dep úmittendi. Alaıda Tramp elektromobılderdi jaqtaýshylar qataryna kirmeıdi.
Buǵan deıin Tesla Shanhaıda Megapack akkýmýlıatorlary óndirisin iske qosqanyn jazǵan bolatynbyz.