Tesla 2027 jyly Cybertruck óndirisin toqtatady
ASTANA. KAZINFORM — Tesla kompanııasynyń bas dırektory Ilon Mask 2027 jyldyń ortasyna deıin Tehastaǵy zaýyt Cybertruck kólikterin óndirýdi toqtatatynyn málimdedi, dep habarlaıdy Kazinform agenttiginiń menshikti tilshisi CBS News-ke silteme jasap.
Tesla áli kúnge elektromobılder sektorynda ústemdik etip keledi. Avtomobıl jasaý salasyna qajet tehnologııalar men qyzmetter usynatyn Cox Automotive kompanııasynyń málimetteri boıynsha, Tesla satylymynyń kóp bóligin Model Y jáne Model 3 modelderi berip otyr. Cybertruck qymbat, oǵan suranys tómen.
AQSh-tyń kólik baǵalaý fırmasy Kelley Blue Book málimetteri boıynsha, Tesla 2025 jyly tek 20 237 Cybertruck satqan, bul 2024 jylǵy 38 965-ten eki esedeı az. Al Mask kezinde jylyna 250 000 kıberjúk kóligi satylady dep boljaǵan.
Degenmen, kólik artqy kórinis kamerasyndaǵy, pedaldardaǵy jáne basqa da komponentterdegi máselelerge baılanysty birneshe ret keri qaıtarylyp alyndy. Sondyqtan, kompanııa ózdiginen júretin Cybercab taksı kóligin óndirý kólemin arttyrýǵa kóbirek kóńil bólmek.
— Mask bar nazaryn robototehnıkaǵa jáne robotaksı salasyna aýdarady, óıtkeni Cybertruck óndirisi aıaqtalyp keledi, — dedi Ýoll-strıt taldaýshysy Den Aıvz.
2024 jyly Tesla rýlsiz jáne pedalsyz eki oryndyq Cybercab kóligin tanystyrdy. Ony jasaýǵa kompanııanyń Tehastaǵy zaýyty bıyl sáýir aıynda kiristi, al satylym Tehas shtatynyń Ostın qalasynda qyrkúıek aıynda bastaldy.
Eske sala keteıik, qyrkúıekte Tesla robotaksıge tapsyrys berý úshin qoldanylatyn qosymshany iske qosqany habarlanǵan.
Tesla 2027 jyly adam tektes Optimus robottaryn satylymǵa shyǵarmaqshy.
