Teriskeıge kóshken túrkistandyqtar kásip bastap, eńbek ónimdiligin arttyryp otyr
Pavlodar oblysyna qonys aýdarǵan Túrkistan oblysynyń turǵyndary kásip bastap, jergilikti halyqty jumyspen qamtyp otyr, dep habarlaıdy Kazinform.
Búgingi kúni ońtústik óńirlerden soltústikke qonys aýdarǵan turǵyndar eńbek ónimdiligin arttyryp otyr. Olardyń biri ınjener, biri muǵalim bolyp abyroıly qyzmet artqarýda. Tipti, tynymsyz eńbektiń arqasynda kásip ashyp, kól kósir paıda taýyp otyrǵandary bar.
Saıram aýdanynyń turǵyny Zored Mavlanov Pavlodar oblysy, Konstantınovka aýylyna kóship barǵan. Jas kásipkerdiń búginde «Karım» fermerlik qojalyǵynda 3,5 gektar kartop alqaby bar. Nápaqasyn jer anadan izdegen sharýa bıyl 100 tonna ónim aldy. Odan bólek, sharýanyń 400-ge jýyq iri qara maly da bar.
«Ózim úırengen ataqonystan kóshý ońaı bolǵan joq. 2019 jyldyń sáýir aıynda áke-sheshemmen birge kóship keldik. Bastapqyda bul jerler bos jatqan edi. Osynda kele sala mal sharýashylyǵyn qolǵa alyp, úı salyp aldyq. «Sybaǵa» dep atalatyn aýyl sharýashylyǵyn qoldaý baǵdarlamasy arqyly 70 mln teńge nesıe alyp, kásip bastadyq. Aıta keterligi, soltústik óńiriniń topyraǵy óte qunarly. Egin sharýashylyǵymen aınalasýǵa óte qolaıly. Byltyrdan beri kartop egip, mol paıda taýyp kelemin», – deıdi ol.
Saıram aýdany Qarabulaq eldi mekeninde turyp kelgen Týlkınjon ıÝsantaev ta osy Konstantınovka aýylyna turaqtaǵan. Onyń qonys aýdarǵanyna 4 jyl boldy. Bala kúninen egin sharýashylyǵynyń qyr-syryn meńgergen ol, qazirgi tańda 20 gektar aýmaqtan egin jınap, saýdaǵa shyǵaryp otyr.
Topyraǵy qunarly, aýasy taza aýylda pııaz, turyp, asqabaq, qyryqqabat pen qarbyz ekken. Negizgi ónimi kartopty apta saıyn jármeńkeler arqyly saýdaǵa shyǵarady. Aldaǵy ýaqytta egistik kólemin arttyrý arqyly ónim kólemin de molaıtýdy josparlap otyr.
Teriskeıge kóship, kásip ashqan azamattardyń arasynda Tólebı aýdanynyń turǵyndary da bar. Kóksáıek eldi mekeninde týǵan Nursultan Qapparov osydan 6 jyl buryn Pavlodar oblysy Sharbaqty aýylyna qonys aýdarǵan. «Sýyq jer» dep jatsynbaı, birden eńbek etýge kirisken. Áýeli aýylǵa qajetti kásip túrlerinen bastapty. Memlekettik grant esebinde tómengi paıyzben nesıe alyp, shashtaraz ashyp, birneshe turǵyndy jumyspen qamtyǵan. Keıin samsa pisirip satatyn oryn daıyndaǵan. Qos kásipten jaqsy paıda tapqan ol, aýyl aımaǵynnan dámhana men kólik jýý beketin ashqan. Osylaısha Nursultan búginde aýyldyń 10-nan astam turǵynyn jumyspen qamtyp otyr. Jas kásipker aldaǵy ýaqytta kólik jóndeý ortalyǵyn ashpaq nıette.
Mamandardyń sózine súıensek, Túrkistan óńirinen Pavlodar óńirine qonys aýdarýshylar qatary jyl saıyn artyp keledi. Máselen, Eńbek jáne halyqty áleýmettik qorǵaý mınıstrligi esebinen bólingen kvota negizinde bıylǵy jyldyń 9 aıynda 340 otbasy, 1426 adam qonys aýdarǵan.
«Jalpy memlekettik kvotaǵa qaramastan, óz erkimen ońtústikten soltústikke qonys aýdaryp jatqandarda kóp. Kóshti bastap kelýshiler ornyǵyp alǵan soń, aýylda jumyssyz júrgen týystaryn, tanystaryn óz janyna shaqyryp alady. Olarda egin jáne mal sharýashylyǵymen aınalysyp jatyr. Al jubaılary mektepke muǵalim, aýrýhanaǵa dáriger, balabaqshaǵa tárbıeshi bolyp qyzmetke ornalasady. Balalary da aýyl mektepterine kelip, bala sanyn kóbeıtýde. Eń bastysy – jyl óte kúngeılikter teriskeıge kóshý arqyly óz ómirin jaqsartýǵa bolatynyna kózi jetkizip jatyr», –deıdi túrkistandyqtardyń jaǵdaıyn bilip qaıtqan delegatsııa múshesi, áleýmettik jeli belsendisi Qaırat Káribaev.
