Teris qylyq úshin jumystan shyǵarylǵandardy memqyzmetke qabyldaýdy shekteý merzimi ózgerdi
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine olardy Qazaqstan Respýblıkasy Konstıtýtsııasynyń normalaryna sáıkes keltirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Zań jobasynyń negizgi maqsaty - memlekettik qyzmet salasyndaǵy zańnamany konstıtýtsııalyq normalarǵa sáıkes keltirý.
«Zań jobasy Konstıtýtsııalyq Sottyń 2023 jylǵy 6 naýryzdaǵy № 4 normatıvtik qaýlysyn júzege asyrý maqsatynda ázirlendi. Konstıtýtsııalyq Sot azamat B.Q. Argýmbaevtyń «Qazaqstan Respýblıkasynyń memlekettik qyzmeti týraly» Zańnyń 16-baby 3-tarmaǵynyń 6) tarmaqshasynyń Konstıtýtsııaǵa sáıkestigi týraly ótinishin qarady. Osy norma memlekettik qyzmetke kir keltiretin tártiptik teris qylyq úshin tártiptik jaýapqa tartylǵan azamattardy 3 jyl boıy memlekettik qyzmetke qabyldaýdy shekteıdi. Bul rette, memlekettik qyzmetke osyndaı tártiptik teris qylyq jasaǵany úshin jumystan bosatylǵan azamattar ómir boıy jiberilmeıdi. Konstıtýtsııalyq sot azamattardyń memlekettik qyzmetke kirýge quqyǵy tek zańdarmen jáne konstıtýtsııalyq qurylysty qorǵaý, qoǵamdyq tártipti, adamnyń quqyqtary men bostandyǵyn, halyqtyń densaýlyǵy men adamgershilik qaǵıdattaryn saqtaý úshin qajet shamada ǵana shektelýi múmkin ekenin atap ótti», - dedi QR Memlekettik qyzmet isteri agenttiginiń tóraǵasy Darhan Jazyqbaı.
Konstıtýtsııalyq Sottyń pikirinshe, qoldanystaǵy zańnamaǵa sáıkes, ákimshilik jáne qylmystyq quqyq buzý áreketterin jasaǵan azamattardyń jaǵdaıy tártiptik teris qylyqtar úshin jumystan shyǵarylǵan adamdarmen salystyrǵanda jeńilirek.
«Memlekettik qyzmet týraly zańnyń 16-baby 3-tarmaǵynyń 6) tarmaqshasynyń erejeleri azamattardyń konstıtýtsııalyq quqyqtaryna qysym jasaýǵa ákep soǵady, ádildik, proportsıonaldyq jáne mólsherlestik talaptaryna saı kelmeıdi. Konstıtýtsııalyq Sottyń quqyqtyq ustanymyna sáıkes, mundaı kemshilikterdi joıý úshin zań jobasymen Memlekettik qyzmet týraly zańǵa tıisti túzetýler engizý eskerilgen. Budan basqa, zań jobasy Konstıtýtsııalyq Sottyń 2023 jylǵy 14 shildedegi № 22-NQ normatıvtik qaýlysyn iske asyrýǵa baǵyttalǵan», - dedi agenttik basshysy.
Zań jobasy Memlekettik qyzmet týraly zańnyń 16, 59, 61, 64-1-baptaryna túzetýlerdi qamtıdy. Merzimsiz tyıym salýdyń ornyna memlekettik qyzmetke kir keltiretin tártiptik teris qylyq jasaǵany úshin jumystan shyǵarylǵan azamatty memlekettik qyzmetke qabyldaýdy shekteýdiń 2 jyldyq merzimi belgilenedi (16-baptyń 3-tarmaǵynyń 6) tarmaqshasy).
«Qujatta memlekettik qyzmetke kirý kezindegi shekteýlerdi salaaralyq saralaý (dıfferentsıatsııalaý) kózdelgen. Shekteýler boıynsha normalardyń redaktsııasy ózgergendikten, 59 jáne 61-baptarǵa túzetýlermen Zańnyń 16-babynyń erejelerine tıisti siltemeler jasaldy. Sondaı-aq, kelisimsharttyq qyzmetshiler boıynsha 64-1-baby (uqsas shekteýler) jáne 2023 jylǵy 3 qańtardaǵy Zańnyń normalary da 16-bapqa sáıkes keltirilgen. Zań jobasyn qabyldaý teris áleýmettik-ekonomıkalyq jáne quqyqtyq saldarǵa ákep soqpaıdy», - dedi Darhan Jazyqbaı.
