Terrorızmnen zardap shekken balalarǵa kómek boıynsha Qazaqstan saıasaty BUU-da talqylandy
Birikken Ulttar Uıymynyń Qylmystyń aldyn alý jáne qylmystyq sot tóreligi jónindegi 14-shi Kongresi (Kıoto, Japonııa) aıasynda BUU Esirtki jáne qylmys basqarmasynyń (EQB) uıymdastyrýymen terrorızm jáne ekstremızmnen zardap shekken balalardyń ahýaly taqyrybynda arnaıy is-shara ótti.
Bul sessııaǵa Qazaqstan Syrtqy ister mınıstrliginiń Erekshe tapsyrmalar jónindegi elshisi Talǵat Qalıev qatysty.
T.Qalıev elimizdiń «Jýsan» jáne «Rýsafa» gýmanıtarlyq operatsııalary sheńberinde balalardy Sırııa jáne Iraktan elge qaıtarý tájirıbesin baıandap berdi.
Kezekti operatsııanyń qorytyndysy boıynsha bıylǵy aqpan aıynyń basynda taǵy 7 bala Otanǵa oralǵany belgili.
«Qazirgi tańda elimizdiń memlekettik organdary árbir bala úshin jeke-jeke ázirlengen psıhologııalyq jáne bilim alý baǵdarlamalary sheńberinde keshendi kómek kórsetýdi jalǵastyryp otyr», - dep málimdedi ol.
Osyǵan oraı BUU EQB jáne basqa halyqaralyq seriktesterimizge qazaqstandyq balalardy ońaltý jáne qaıta beıimdeý salasynda kórsetip otyrǵan járdemi úshin rızashylyq, sondaı-aq odan ári bul saladaǵy tájirıbemen almasýǵa daıyndyq bildirildi.
«BUU EQB ókilderi Qazaqstan Taıaý Shyǵystaǵy áskerı qaqtyǵys aımaqtarynda qalyp qalǵan balalardy qaıtarý jáne reıntegratsııalaý isinde álemdegi kóshbasshylardyń qatarynda ekenin atap ótti.
Sonymen qatar, is-shara barysynda kámeletke tolmaǵandardy terrorıstik jáne ekstermıstik is-áreketke tartýdyń aldyn alý jáne oǵan qarsy turýǵa baǵyttalǵan Eýropalyq odaq, Japonııa, Indonezııa, Irak jáne Nıgerııanyń bastamalary talqylandy», - dep málim etti QR Syrtqy ister mınıstrliginen.
