Terrorızmmen kúres ujymdyq sıpatqa ıe bolýy kerek- Aýǵanstan ókili

NUR-SULTAN. QazAqparat –Terrorızmmen kúres ujymdyq sıpatqa ıe bolýy kerek. Bul týraly Aýǵanstan Islam Respýblıkasynyń qaýipsizdik jáne shekaralyq ister máseleleri boıynsha yntymaqtastyq departamentiniń dırektory Mohammad Faızı aıtty, dep habarlaıdy QazAqparat tilshisi.

«Jyldar boıy Aýǵanstan terrorızmniń qurbany bolyp keledi. Bizdiń el - bul jaǵdaımen kúresýde bárinen kóp zardap shekken memleket. Biz terrorızmmen kúres ujymdyq sıpatqa ıe bolý kerek dep esepteımiz. Talıban – Aýǵanstan aýmaǵynda júrgen sheteldik qarýly toptardyń seriktesi. Qarýly toptar ártúrli ulttardan turady. Sol sebepti, olar Aýǵanstannan bólek, búkil álemge qaýip tóndirip tur. Ókinishke qaraı, Talıban Aýǵanstannan tys ta ózimen seriktes kúshterge qarý, adam men bazalardy shyǵaryp berýge qaýqarly. Olar esirtkiden paıda tabady. Tabystyń turaqty túrde túsip turýy olarǵa krımınaldyq sındıkattarmen baılanys ustap otyrýǵa jol ashady. Esirtki– talıbter úshin tabys kózi bolyp otyr», - dedi Mohammad Faızı Nur-Sultanda ótip jatqan Eýropadaǵy qaýipsizdik jáne yntymaqtastyq uıymynyń (EQYU) Aýǵanstan boıynsha dóńgelek ústelinde.

Aýǵanstan ókiliniń aıtýyna qaraǵanda, aýǵan bıligi esirtkimen kúresti barynsha qatań júrgizýge tyrysady. Esirtki ósiriletin alańdarǵa arnaıy áskerı ushaqtardy ushyrady.

«Esirtki saýdasynyń jolyn kesýdi barynsha kúsheıtip kelemiz. Dese de, Aýǵanstannan tys ta geroın óndiretin laborotorııalar bar. Halyqaralyq deńgeıde esirtkige degen suranys joǵary. Suranys aqyry talıbandyqtarǵa da, krımınaldyq sındıkattarǵa isterin jalǵastyra berýge múmkindik berip otyr. Sol sebepti, esirtki trafıgi máselesimen birlees kúresýimiz kerek», - dedi ol.

Eske sala ketsek, Nur-Sultanda ótip jatqan Eýropadaǵy qaýipsizdik jáne yntymaqtastyq uıymynyń (EQYU) Aýǵanstan boıynsha dóńgelek ústelinde Muhtar Tileýberdi Aýǵanstannyń ekonomıkasyn kórshi eldermen, sonymen birge Ortalyq Azııa memleketterimen ıntegratsııalaýdyń mańyzy zor ekenin atap ótken bolatyn.