Terrorızmge qatysy bar, qorshaǵan ortaǵa orny tolmas zalal keltirgen zańdy tulǵalardy qylmystyq jaýapkershilikke tartý barysynda olardy birden taratý usynylady - A. Lýkın
ASTANA. 3 maýsym. QazAqparat /Qanat Mámetqazyuly/ -Terrorızmge qatysy bar, qorshaǵan ortaǵa orny tolmas zalal keltirgen zańdy tulǵalardy qylmystyq jaýapkershilikke tartý barysynda olardy birden taratý usynylady.
Búgin QR Parlamenti Májilisiniń janyndaǵy Qoǵamdyq Palatanyń otyrysynda «Qazaqstan Respýblıkasynyń keıbir zańnamalyq aktilerine zańdy tulǵalardyń qylmystyq jaýapkershiligin engizý máselesi boıynsha ózgerister men tolyqtyrýlar engizý týraly» zań jobasyn talqylaý barysynda Ekonomıkalyq qylmysqa jáne sybaılas jemqorlyqqa qarsy kúres agenttigi tóraǵasynyń orynbasary Andreı Lýkın osylaı málim etti.
«Zańdy tulǵalardyń qylmystyq jaýapkershiligi eń aldymen terrorıstik qylmystar úshin qoldanylady. Bul rette áńgime terrorızmdi qarjylandyratyn kásiporyndar, zańdy tulǵalar týraly bolyp otyr. Álemde oryn alyp otyrǵan ǵalamdyq qaýip-qaterlerdi eskere kele, jeke tulǵalarǵa ǵana terrorıstik áreketi úshin qylmystyq jaýapkershilikti qarastyryp qana qoıýǵa bolmaıdy. Óıtkeni, qarjylandyrylmasa terrorızmniń áreketi de júzege aspaıtyny belgili. Sondyqtan da, bizdiń mindetimiz eń aldymen terrorızm sıpatyndaǵy qylmystardyń jolyn kesý»,- deıdi A. Lýkın. Bul rette agenttik ókili zań jobasy boıynsha terrorızmdi qarjylandyrýǵa qatysy bar zańdy tulǵaǵa eń joǵary úkim shyǵarylyp, ondaı kásiporyndy birden taratý kózdeletinin atap ótti.
Budan bólek, ekologııa salasyndaǵy qylmysy úshin de zańdy tulǵalarǵa qylmystyq jaýapkershilik kózdeledi. Onyń ishinde qorshaǵan ortaǵa orny tolmas shyǵyn jasaǵan kásiporyndarǵa da taratý týraly úkim usynylyp otyr. «Al zańdy tulǵalardyń ekonomıkalyq qylmystaryn qamtıtyn máselege keletin bolsaq, bulardyń negizgi bóligi «jalǵan kásiporyndarǵa» qatysty bolyp tabylady», - dedi A. Lýkın.
