Terrorızmge qarsy kúreske jumsalatyn qarjy úsh esege artty
QR Ulttyq qaýipsizdik komıteti tóraǵasynyń orynbasary Nurǵalı Bilisbekovtiń aıtýynsha, ótken jyly dinı ekstremızm men terrorızmge qarsy is-qımyl jónindegi memlekettik baǵdarlamany iske asyrý jumysy aıaqtalǵan bolatyn. 2013 jyldan beri barlaý qyzmeti 38 terraktiniń aldyn alyp, qaýipsizdik talaptaryna saı keletin nysandardyń sany artty. Budan bólek, aqparattyq túsindirý jumystary keńinen atqaryldy. Internet pen áleýmettik jelide dinı ekstremızmge qarsy kúres sharalary kúsheıtildi. "Osy baǵdarlamany iske asyrý kezinde jalpy 98 mlrd teńge ıgerildi. Sonyń ishinde respýblıkalyq bıýdjetten 27,8 mlrd, al jergilikti bıýdjetten 70,2 mlrd teńge bólindi", - dep atap kórsetti N.Bilisbekov.
Onyń aıtýynsha, jańa besjyldyq baǵdarlama aıasynda buǵan deıingi sharalar jalǵasatyn bolady. 2018-2022 jyldary ishinde atqarylatyn jumystyń naqty ındıkatorlary da belgilendi. Sonyń ishinde radıkaldy kózqarastaǵy adamdardyń sanyn azaıtý, arnaıy kúsh qurylymdardyń materıaldyq jaǵdaıyn kúsheıtý, qaýipsizdik talaptaryna saı keletin nysandardyń sany arttyrý jáne taǵy basqa talaptar bar. "Jańa baǵdarlama aıasynda 80 is-sharany oryndaý josparlanǵan. Sonyń ishinde 35-si arnaıy sıpatta. Sonyń barlyǵyn iske asyrý úshin bes jyldyń ishinde 270 mlrd teńgeden astam qarjyny bólý kózdelip otyr. Respýblıkalyq bıýdjetten 209,3 mlrd, al jergilikti bıýdjetterden 60,7 mlrd teńge bólinedi", - deıdi N.Bilisbekov.
Aıta keteıik, Mınıstrler kabıneti terrorızmge qarsy kúreske arnalǵan besjyldyq baǵdarlamanyń jobasyn maquldady.
