Terrorızmge qarsy kópjaqty strategııalyq áreketterdi qabyldaý úshin álem bolyp jumylatyn ýaqyt keldi - Amal Abdalla Al-Kýbeısı
ASTANA. QazAqparat - Terrorızmge qarsy kópjaqty strategııalyq áreketterdi qabyldaý úshin álem bolyp jumylatyn ýaqyt keldi. Búgin Astanada «Dinder terrorızmge qarsy» atty halyqaralyq konferentsııa barysynda sóz sóılegen Birikken Arab Ámirlikteri Federaldy ulttyq keńesiniń tóraıymy doktor Amal Abdalla Al-Kýbeısı osylaı málimdedi.
«Terrorızm adamzat órkenıetine úlken qater tóndirip keledi. Bizdiń aldymyzda terrorızmniń barlyq túrlerin túbegeıli joıý úshin qoldan kelgenshe júzege asyratyn adamgershilik, etıkalyq jaýapkershilikter tur. Áıtpese, biz jarqyn bolashaqty qamtamasyz ete almaımyz. Biz terrorızmmen kúreste qolymyzdan keletin barlyq kúshterdi jumyldyrýǵa tıispiz. Terrorızmge qarsy kópjaqty strategııalyq áreketterdi qabyldaý úshin álem bolyp jumylatyn ýaqyt keldi», - dedi Amal Abdalla.
Onyń aıtýynsha, terrorlyq aktiler asa qaýipti aýrýlar belgilerin kórsetip otyr. Osyǵan oraı, spıker bundaı «belgilerdi» joıyp, olardy túbirimen joıý sharalaryna nazar aýdardy. «Árıne, bizge belgilisi aýrýdyń belgileri ǵana. Al onyń shyǵý tórkinine keler bolsaq, olar: kedeıshilik, bilimsizdik, basqalardy syılamaý, tózimsizdiktiń joqtyǵy. Sondyqtan da, biz terrorızmmen kúres týraly aıtsaq, onda osyndaı túbirlerge qarsy keń aýqymdy sharalardy qolǵa alýǵa tıispiz. Máselen, sonyń biri kedeılikti joıý. BUU derekterine sáıkes, búgingi tańda álemde 830 mln-nan astam adam kedeıliktiń sheginde ómir súrýde. Jumys istep, kúnine tek eki dollarǵa nápaqa tabatyndar sany qanshama. Al bir dollarǵa kúneltetin kedeı halyqtyń basym bóligi Azııanyń ońtústik bóliginde, Afrıkadaǵy Saharada turyp jatyr. Bul adamzattyń aldyndaǵy zor qasiret», - dedi Amal Abdalla.
