Terrorızmge qarsy is-qımyl jónindegi zań jobasy Parlamenttiń kelisim komıssııasynda talqylanady
ASTANA. Aqpannyń 4-i. QazAqparat /Qanat Mámetqazyuly/ ‑ Búgin QR Parlamenti Senatynyń jalpy otyrysynda palata depýtattary «QR keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasy boıynsha qos palata arasyndaǵy kelispeýshilikterdi eńserý úshin kelisim komıssııasyn qurý týraly sheshim qabyldap, onyń quramyna palata depýtattaryn saılady,
dep habarlaıdy QazAqparat.
Atalǵan zań jobasy 2007-2011 jyldarǵa arnalǵan Ulttyq qaýipsizdik strategııasy erejelerin oryndaý maqsatynda ázirlengen. Zań jobasy buryn terrorıstik qylmys jasaǵan adamdarǵa eskirý merzimderin qoldanýǵa tyıym salý, ekstremıstik nemese terrorıstik uıymnyń óz ataýyn ózgertý faktisin sottyń anyqtaý tetigin bekitý sharalaryn qarastyrady. Sonymen birge qujatta BAQ-tarda terrorızmge qarsy operatsııalardyń tehnıkalyq tásilderi men taktıkasyn ashatyn málimetterdi taratýdy shekteýge, lańkestikke qarsy operatsııanyń quqyqtyq tártibin retteýdi jetildirýge baǵyttalǵan áreketter kózdeledi. Budan basqa, jobada qamtylǵan ózgertýlerdiń bir parasy áli bolmaǵan terrorıstik qaýipterdiń aldyn alýǵa qatysty bolyp tabylady.
Májilis maquldaǵan zań jobasyna senatorlar sheteldik nemese halyqaralyq uıymdy ekstremıstik nemese terrorıstik dep taný týraly is júrgizý sheńberinde sottyń osyndaı uıymdardyń ataýlaryn ózgertý faktisin anyqtaý tártibin qarastyrý sharalaryn usynǵan bolatyn. Budan basqa, Senat terrorızmge qarsy operatsııaǵa qatysatyn adamdardyń múmkindikterin negizsiz taryltýdy boldyrmaý maqsatynda azamattardyń turǵyn úı-jaılaryna terrorısterdiń izine túsken kezde ǵana kirýge bolady degen qaǵıdany alyp tastaýdy usynǵan edi. Sondaı-aq júrgizilgen is-qımyldardyń zańdylyǵyn tekserý úshin turǵyn úıge kirý faktileri týraly habarlamany 24 saǵat ishinde prokýrorǵa jiberý týraly norma tolyqtyrylǵan bolatyn.
Májilis birqatar túzetýler boıynsha óz ustanymdaryn qorǵap kelisim komıssııasyn qurýdy alǵa tartqan edi. Osyǵan oraı, komıssııa quramyna palata atynan depýtat Serik Aqylbaı, Nurlyǵaıym Joldasbaeva, Baýyrjan Muhamedjanovtar saılandy.
