Terrorızmge qarsy qorǵaý talaptaryn buzǵan 263 basshy jaýapkershilikke tartyldy
ASTANA. KAZINFORM — Bıylǵy jyldyń alǵashqy bes aıynda Qazaqstanda terrorızmge qarsy qorǵanys talaptaryn buzǵany úshin 263 nysan basshysy ákimshilik jaýapkershilikke tartyldy. Іshki ister mınıstrliginiń málimetinshe, júrgizilgen tekserister barysynda 736 nysanda zańbuzýshylyq anyqtalyp, jalpy aıyppul somasy 118 mıllıon teńgeden asty. Bul týraly ІІM málim etti.
Іshki ister mınıstrligi terrorızm turǵysynan osal nysandardyń terrorızmge qarsy qorǵalýyn qamtamasyz etý boıynsha júıeli jumysty jalǵastyra beredi.
— 5 aıda ishki ister organdary terrorızm turǵysynan osal 2 665 obektini tekserdi. Onyń ishinde 2 458-i josparly, 207-si jospardan tys tártippen júrgizildi. Tekserilgen nysandardyń 72%-ynda terrorızmge qarsy qorǵalý deńgeıi belgilengen talaptarǵa sáıkes keldi. 736 obektide zańbuzýshylyqtar anyqtalyp, olardyń basshylaryna anyqtalǵan kemshilikterdi joıý týraly nusqamalar berildi. Terrorızmge qarsy qorǵaý talaptaryn oryndamaǵany úshin 263 basshy ákimshilik jaýapkershilikke tartyldy, — delingen habarlamada.
Salynǵan aıyppuldardyń jalpy somasy 118 mıllıon teńgeden asty. Túsindirý jumystarymen 3,2 myńnan astam obekt basshysy men menshik ıesi qamtylsa, oqý is-sharalaryna 237 myńnan astam qyzmetker qatysty. Sonymen qatar 48 nusqaýlyqqa revızııa júrgizilip, obektilerdi kúzetý talaptaryn jetildirý boıynsha usynystar engizildi.
