Terrorızmdi nasıhattaǵan jəne dinı alaýyzdyqty qozdyrǵan eki adam ustaldy - Aqmola oblysy

KÓKShETAÝ. QazAqparat - Terrorızmdi nasıhattaǵany jəne  dinı alaýyzdyqty qozdyrǵany úshin Aqmola oblysynyń eki turǵyny qylmystyq jaýapkershilikke tartyldy. Qazirgi kezde, tergeý sharalary aıaqtalyp, is sotqa joldanǵan, dep habarlaıdy QazAqparat tilshisi ІІD baspasóz qyzmetine silteme jasap.

Polıtseılerdiń deregi boıynsha, 2017 jyldyń qyrkúıek aıynda Kókshetaý qalasynda ІІD Lańkestikke qarsy kúres basqarmasynyń qyzmetkerleri dinı alaýyzdyqty qozdyrýmen aınalysty degen kúdikpen 33 jastaǵy jergilikti turǵyndy ustady.

Tergeý amaldary kezinde anyqtalǵandaı, er adam uzaq ýaqyt namazǵa jyǵylǵan. Keıin kóptegen ədebı kózderdiń yqpalymen ıslamnyń dəsúrli emes aǵynyn ustana bastaıdy. Sondaı-aq óziniń dinı bilimin jetildirý maqsatynda er adam túrli dinı kitaptar men aqparat saıttaryn oqyp, úıinde dinı taqyryptaǵy kitaptardy basady jəne úıinde ustaıdy.

Úıin tintý kezinde polıtseıler "Salıh bın Faýzan al-Faýzan sheıhtiń úsh negizine pikir", "Islamnyń paryzy jəne nanym-senimderi" kitabynyń kóshirmesi men ózge de dinı kitaptardy tapty.

Sottyq-dintaný saraptamasynyń qorytyndysy boıynsha, kúdiktiniń úıinen tárkilengen kitaptarda dinı alaýyzdyqty qozdyrý belgileri bary anyqtaldy. Osyǵan baılanysty kúdiktiniń ústinen QR QK 174 babynyń 1 bólimi boıynsha tergeý amaldary júrgizildi. Qazirgi kezde qylmystyq is sotqa joldandy.

Atalǵan bap boıynsha kúdiktiniń qylmysy dəlendense, onda ol 2 jyldan 7 jylǵa deıin sottalýy múmkin.

Al, Stepnogor qalasynda 16 jyl psıhıatr dárigerdiń esebinde turǵan 26 jastaǵy jergilikti turǵyn terrorızmdi nasıhattaý jəne terrorıstik akti jasaýǵa ashyqtan-ashyq shaqyrǵany úshin aıyptalyp otyr. Kúdikti 2014 jyldan bastap, "at-Takfır - ýa-l-hıdjra" dinı uıymnyń ıdeologııasyn tereńdetip oqyǵan. Bul sot sheshimi boıynsha lańkestik dep tanylyp, QR aýmaǵynda nasıhattaýǵa ruqsat etilmegen bolyp sanalady.

Teris baǵyttaǵy dinı kitaptar oqýmen aınalysqan qyz tanymal əleýmettik jeliler arqyly laqap atpen terrorıstik əreketter men terrorıstik akti jasaýǵa shaqyratyn materıaldar taratqan.

Onyń bul əreketi QR QK 256 babynyń 2 bólimi boıynsha qylmystyq is retinde qaralyp otyr.

Qazirgi kezde, kúdikti qyz júıke-júıesi dertimen aýyratyndardy emdeý mekemesinde kýrstan ótýde. Al, onyń ústinen qozǵalǵan qylmystyq iske qatysty tergeý amaldary aıaqtalyp, is materıaldary sotqa medıtsınalyq sıpattaǵy sharany məjbúrlep qoldaný úshin joldandy.