Terrorızmdi qarjylandyrýǵa qarsy is-qımyl máseleleri boıynsha zań jobasy qaraldy

Zań jobasy Qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi Eýrazııalyq toptyń 14-shi Jalpy otyrysynda qabyldanǵan Qazaqstan Respýblıkasynyń ózara baǵalaý esebiniń ulttyq zańnamany halyqaralyq standarttarǵa jáne Aqshany jylystatýǵa jáne terrorızmdi qarjylandyrýǵa qarsy kúrestiń qarjylyq sharalaryn ázirleý toby (FATF) qabyldaǵan jańartylǵan usynymdarǵa sáıkes keltirý bóligindegi eskertpelerin iske asyrý maqsatynda ázirlendi.

Zań jobasy otyz úsh zańnamalyq aktige, onyń ishinde alty kodekske ózgerister men tolyqtyrýlar engizýdi kózdeıdi.

Zań jobasymen kózdelgen zańnamalyq aktilerge ózgerister engiziledi, onda «zańsyz jolmen alynǵan kirister» degen uǵym «qylmystyq jolmen alynǵan kirister» degen anyqtamaǵa aýystyrylady. Qazaqstan Respýblıkasynyń Qylmystyq kodeksine tolyqtyrýlar engiziledi, olarǵa sáıkes baǵaly qaǵazdar naryǵynda aıla-sharǵy jasaǵany jáne ınsaıderlik aqparatty zańsyz paıdalanǵany úshin jaýaptylyq belgilenedi.

Budan basqa, qylmystardan alynatyn kirister bolyp tabylatyn múlikti konversııalaýdy nemese aýdarýdy krımınaldyq áreket dep taný, sondaı-aq qylmystardan alynatyn kiristerdi tárkileý jáne alyp qoıý kózdeledi.

«Zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly» Qazaqstan Respýblıkasynyń Zańyna ózgerister men tolyqtyrýlar mynalardy kózdeıdi.

«Benefıtsıarlyq menshik ıesi», «korrespondenttik qatynastar», «qalqa-bank», «shet memlekettiń quzyretti organy», «is júzindegi qatysýy», «iskerlik qatynastar» degen uǵymdar engizildi.

Zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy máseleler boıynsha qarjy monıtorıngi sýbektileriniń tizbesin mıkroqarjy uıymdary, elektrondyq aqsha júıeleriniń operatorlary, býhgalterlik uıymdar men kásibı býhgalterler tolyqtyrdy.

Qarjy monıtorıngi sýbektileriniń óz klıentterin, olardyń ókilderin jáne benefıtsıarlyq menshik ıelerin, sondaı-aq sheteldik qarjy uıymdarymen korrespondenttik qatynastar ornatylǵan kezde tıisinshe tekserýi jónindegi sharalar tolyqtyryldy. Qalqa-bankter qurýǵa jáne olardyń qyzmetine, sondaı-aq olarmen korrespondenttik qatynastar ornatýǵa tikeleı tyıym salynǵan.

Qarjy monıtorıngi sýbektilerine arnalǵan ishki baqylaý qaǵıdalary naqtylandy. Kúdikti operatsııalardy toqtata turý tetigi jetildirildi. Terrorızmdi jáne ekstremızmdi qarjylandyrýǵa baılanysty uıymdar men tulǵalardyń aktıvterin toqtata turý (buǵattaý) tetikteri belgilendi.

Ýákiletti organnyń quqyq qorǵaý organdarymen jáne arnaýly memlekettik organdarmen birlesip, qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa baılanysty málimetter men aqparat almasý jáne olardy berý boıynsha ózara is-qımyl tártibin aıqyndaý bóligindegi fýnktsııalary tolyqtyryldy.

Budan basqa, ýákiletti organnyń qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl salasyndaǵy yntymaqtastyq máseleleri boıynsha shet memleketterdiń quzyretti organdarymen kelisimder jasasý quqyǵy kózdelgen.

Zań jobasy Palatanyń qaraýyna jiberildi.