Terrorızmdi qarjylandyrý qaýipterin baǵalaýdyń halyqaralyq ortalyǵy quryldy
Bul týraly QazAqparat QR Qarjylyq monıtorıng agenttiginiń baspasóz qyzmetine silteme jasap habarlaıdy.
Baspasóz qyzmetiniń málimetterine qaraǵanda, 2021 jyly 2 aqpanda Táýelsiz Memleketter Dostastyǵy Qarjylyq barlaý bólimsheleri basshylary keńesiniń (QBBBK) 16-shy otyrysy ótti.
Otyrysqa Qazaqstan Respýblıkasy Qarjylyq monıtorıng agenttiginiń tóraǵasy J.Q.Elımanov jáne TMD-ǵa qatysýshy memleketterdiń qarjylyq barlaý bólimsheleriniń basshylary qatysty.
Otyrys barysynda Janat Elımanov Qazaqstan Respýblıkasynda qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl salasyndaǵy qoldanylǵan sharalar boıynsha tájirıbesimen bólisti.
Otyrys qorytyndysy boıynsha mańyzdy sheshimderdiń biri Aqshany jylystatý jáne terrorızmdi qarjylandyrý qaýipterin baǵalaýdyń halyqaralyq ortalyǵynyń (QBHO) qurylýy bolyp tabyldy.
QBHO TMD-ǵa qatysýshy memleketterdiń ulttyq qarjyny jylystaý men terrorızmdi qarjylandyrýǵa qarsy júıeleriniń jańa syn-qaterler men qaýip-qaterlerge daıyn bolýyn, birlesken qarsy sharalardyń ýaqtyly ázirlenýin, sondaı-aq ózara málimet almasýdy qamtamasyz etýge múddeli.
Odan basqa, QBB basshylary aqshany qaıta bólý jáne jylystatý boıynsha qyzmetterdiń kóleńkeli naryq sýbektilerin anyqtaý jáne tergeý salasyndaǵy birlesken jumysty bastaýǵa kelisti.
Sondaı-aq, QBBBK elderiniń qarjylyq barlaý qyzmeti memleketterdiń keden qyzmetterimen birlesip, «Qolma-qol aqshanyń transshekaralyq qozǵalysyn taldaý» jobasy aıasynda qolma-qol aqsha aınalymyn baqylaý boıynsha ózara is-qımyl jasaıtyn bolady.
Otyrys nátıjesinde halyqaralyq terrorıstik uıymdardyń qyzmetine qatysy bar tulǵalardy anyqtaý boıynsha TMD QBBBK men TQO birlesken operatsııasyn júrgizý jospary jáne olardy terrorızmdi qarjylandyrý úshin paıdalaný qaýpi joǵary aýmaqtardyń tizimi bekitildi.
Keńestiń kelesi otyrysyn qolaıly epıdemıologııalyq jaǵdaıdy eskere otyryp, 2021 jyldyń kókteminde Dýshanbe q. (Tájikstan Respýblıkasy) ótkizý josparlanǵan.
