Terrorızmdi nasıhattap, dinı alaýyzdyqty qozdyrýǵa jáne adamdardy tartýǵa qatysqan 5 adam ustaldy
ASTANA. KAZINFORM – Terrorızmge qarsy is-qımyl sheńberinde osy jyldyń shilde-tamyz aılarynda Ulttyq qaýipsizdik komıteti polıtsııa organdarynyń kómegimen jáne prokýratýranyń úılestirýimen Astana qalasynda, Almaty jáne Batys Qazaqstan oblystarynda birqatar is-shara ótkizdi.
Nátıjesinde Qazaqstannyń 5 azamaty ustalyp, sot sanktsııasymen qamaýǵa alyndy.
Tergeý nusqasy boıynsha, olar terrorlyq áreketterdi uıymdastyrý maqsatynda terrorızmdi nasıhattaýǵa, dinı alaýyzdyqty qozdyrýǵa jáne adamdardy tartýǵa qatysqan. Turǵylyqty jerlerin tintý kezinde qarý-jaraq, oq-dáriler, dinı ádebıetter jáne ózge de zattaı dáleldemeler alyndy.
Aıta ketý kerek, kúdiktilerdiń ekeýi kisi óltirý, tonaý jáne buzaqylyq úshin sottyly bolǵan. Taǵy bireýi buryn lańkesterdiń sheteldik lagerlerinde daıyndyqtan ótip, shet memleket aýmaǵynda qarýly qaqtyǵystarǵa qatysqan.
Qylmystyq kodekstiń 174, 256, 259-baptary boıynsha sotqa deıingi tergep-tekserý júrgizilip jatyr.
Qylmystyq-protsestik kodekstiń 201-babynyń 1-bóligine sáıkes ózge aqparat jarııa etilýge jatpaıdy.
