Terrorızm týraly jalǵan habarlama taratqan aqtaýlyq 1,5 jylǵa sottaldy

AQTAÝ. KAZINFORM – Turǵyn azamattyq nekedegi jubaıyn Almaty qalasyna jibermeý úshin 102-jelisine qońyraý shalyp, Aqtaý halyqaralyq áýejaıynda jáne Aqtaý teńiz portynda jarylǵysh zat qoıylǵandyǵy jóninde jalǵan habarlama bergen. 

Atalǵan jerlerdi tekserý barysynda, eshqandaı jarylǵysh zattar men oq-dáriler anyqtalmaǵan. Biraq sonyń saldarynan Aqtaý teńiz saýda portyna, Halyqaralyq Aqtaý áýejaıyna, Mańǵystaý oblystyq jedel medıtsınalyq járdem stantsııasyna, Mańǵystaý oblysy Tótenshe jaǵdaılar jáne Polıtsııa departamentterine materıaldyq shyǵyn keltirilgen.

Osy oqıǵa boıynsha qylmystyq is qozǵalyp, kúdiktiniń is-áreketi sotta qaralǵan. 

Aqtaý qalalyq soty baspasóz qyzmetiniń habarlaýynsha, kúdikti sot úkimimen QR Qylmystyq Kodekstiń 273-babymen kináli dep tanylyp, oǵan 1 jyl 6 aı merzimge bas bostandyǵynan aıyrý jazasy taǵaıyndalǵan.

Úkim zańdy kúshine endi.

Buǵan deıin, Aqtaýda 18 jastaǵy múgedek jigitti belgisiz bireýdiń zorlaǵany týraly jazǵan bolatynbyz.