Terrorızm týraly jalǵan aqparat taratqandar qylmystyq jaýapqa tartylady – ІІM
ASTANA. KAZINFORM – Іshki ister mınıstrligi terrorızm aktisi týraly kórineý jalǵan habarlamalar úshin jaýapkershilik baryn eskertti, dep habarlaıdy Polisia.kz.
Vedomstvo málimetinshe, mundaı áreketter úshin QR Qylmystyq kodeksiniń 273-babyna sáıkes qylmystyq jaýapkershilik kózdelgen. Qazirgi ýaqytta jarylǵysh zat qoıý nemese qoǵamdyq qaýipsizdikke qaýip tóndiretin jalǵan aqparatty baılanys quraldary, ınternet-resýrstar, messendjerler men áleýmettik jeliler arqyly taratý derekteri tirkelip otyr.
– Jarylǵysh zat qoıý nemese qoǵamdyq qaýipsizdikke ózge de qaýipter týraly jalǵan aqparatty taratý, tipti ol ázil nemese qaljyń retinde jasalǵannyń ózinde, qylmystyq quqyq buzýshylyq bolyp tabylady. Mundaı áreketter qoǵamdyq qaýipsizdikke naqty qaýip tóndirip, jappaı evakýatsııalarǵa, memlekettik organdar men áleýmettik nysandardyń jumysynyń toqtaýyna ákeledi, sondaı-aq shuǵyl qyzmetterdiń eleýli kúshteri men quraldaryn alańdatady, – delingen ІІM málimetinde.
Mınıstrlik mundaı qylmystar úshin bas bostandyǵynan aıyrýǵa deıingi jaza qarastyrylǵanyn atap ótti. Sonymen qatar barlyq osyndaı habarlamalar mindetti túrde tekserilip, olardy taratqan tulǵalar zamanaýı tsıfrlyq jáne tehnıkalyq quraldardyń kómegimen anyqtalatyny eskertildi.
– Polıtsııa azamattardy tekserilmegen aqparatty taratpaýǵa, jalǵan shaqyrýlar men habarlamalar jasamaýǵa, balalarǵa mundaı áreketter úshin jaýapkershilik bar ekenin túsindirýge, sondaı-aq qaýip-qateri bar habarlamalar alǵan jaǵdaıda dereý quqyq qorǵaý organdaryna habarlaýǵa shaqyrady, – dep málimdedi vedomstvo.
ІІM azamattardy zań talaptaryn saqtaýǵa jáne tsıfrlyq keńistikte jaýapkershilikpen áreket etýge shaqyrdy.
Aıta keteıik, Semeı turǵyny «órtten 18 adam qaza tapty» degen jalǵan aqparat taratqany úshin jazalandy.
