Terrorızm qaterine baılanysty áýejaı qyzmetiniń mindeti zań júzinde bekitiledi - A. Raý
Eske salaıyq, Májiliste «Qazaqstan Respýblıkasynyń keıbir zańnamalyq aktilerine áýe keńistigin paıdalaný jáne avıatsııa qyzmeti máseleleri boıynsha ózgerister men tolyqtyrýlar engizý týraly» zań jobasynyń tanystyrylymy ótken bolatyn.
«Egıpet pen Belgııadaǵy terrorıstik aktilerden keıin álemde azamattyq avıatsııa salasyndaǵy asa ózekti másele - terrorıstik qaýip-qaterlerden qorǵaý. Osyǵan baılanysty zań jobasymen áýejaılar qyzmetiniń mindetteri bekitiledi, terrorıstik qaýip kúsheıgen jaǵdaıda jolaýshylar termınalyna kireberisinde tekserýler engizý kózdeledi. Buǵan qatysty elimizdiń Qaýipsizdik keńesiniń arnaıy sheshimi bar», - dedi Raý.
Onyń aıtýynsha, avıatsııalyq qaýipsizdik júıesi boıynsha azamattyq avıatsııa salasyndaǵy ýákiletti organnyń ókilettigi keńeıtiledi. Atap aıtqanda, qyzmettik synaqtar, áýejaılar qyzmetiniń personalyn attestattaý sharalary qamtylyp otyr.
«Tutastaı alǵanda áýejaı qyzmetiniń jolaýshylarǵa qyzmet kórsetý men áýe kemelerine jerdegi qyzmetterdi qamtamasyz etý boıynsha sapasyn jaqsartý talap etiledi. Osyǵan baılanysty, áýejaılardaǵy sapany baqylaý baǵdarlamasy júıesi engiziledi. Ushý qaýipsizdigin qamtamasyz etý boıynsha áýe kemesi komandıriniń jaýapkershiligi de qarastyrylady. Jalpy alǵanda zań jobasy arqyly avıatsııa salasyn retteýdegi memlekettik tıimdilik arta túsedi dep boljanady. Sonyń ishinde terrorızmge qatysty qaýipsizdik máselesi kúsheıtiledi», - dedi vıtse-mınıstr.
