Terrorızm aktisi týraly jalǵan habarlama jasaǵandarǵa qandaı jaza qoldanylady

NUR-SULTAN. QazAqparat – Qazaqstanda terrorızm aktisi týraly jalǵan habarlama taratqandar 14,5 mln teńge aıyppul tóleıdi. Bul týraly QR ІІM ekstremızmge qarsy is-qımyl departamenti bastyǵynyń orynbasary Darhan Razýev aıtty, dep habarlaıdy QazAqparat tilshisi.

«Qazaqstanda terrorızm aktisi týraly kórineý jalǵan habarlama úshin 5 000 aılyq eseptik kórsetkishke, ıaǵnı 14,5 mln teńgege deıin aıyppul tóleý nemese osy kólemde túzeý jumystaryna tartý, sondaı-aq 5 jylǵa deıin bas bostandyǵynan aıyrý nemese shekteý jazasy qoldanylady. Osy qylmysty jasaǵany úshin 14 jasqa tolǵan balalar qylmystyq jaýapqa tartylady. Sondyqtan muny mektep oqýshylary bilýi tıis», - dedi Darhan Razýev ІMM baspasóz qyzmeti alańynda ótken brıfıngte.

Sonymen qatar onyń aıtýynsha, osyndaı habarlamanyń kesirinen keltirilgen barlyq shyǵyndar ótelýi tıis. Mundaı áreketti kámeletke tolmaǵan bala jasaǵan bolsa, shyǵyndy ata-anasy óteıdi.

«Terrorızm aktisi týraly kórineý jalǵan habarlama – ol ázil de, ermek te emes. Bul qylmystyq jazalanatyn áreket ekenin taǵy da esterińizge salǵym keledi. Jalǵan habarlama berilgen ýaqyttan bastap aıaqtalǵan qylmys bolyp esepteledi. Іsterin istep alyp, keıin qansha ókinse de, qaskóı qylmystyq jaýapkershilikten qutyla almaıdy»,- dedi departament bastyǵynyń orynbasary.