Terrorızm aktisi týraly habarlaǵandarǵa qansha syıaqy tólenedi

ASTANA. QazAqparat – QR Ulttyq qaýipsizdik komıteti tóraǵasynyń terrorızm aktisiniń aldyn alýǵa nemese onyń jolyn kesýge kómektesetin aqparat usynǵan adamdarǵa syıaqy berý týraly buıryǵy jarııalandy, dep habarlaıdy QazAqparat tilshisi.

«QR Ulttyq qaýipsizdik nemese ishki ister organdaryna terrorızm aktisiniń aldyn alýǵa nemese jolyn kesýge kómektesken aqparatty habarlaǵan adamdarǵa UQK nemese onyń aýmaqtyq organdary syıaqy tóleıdi», - dep jazylǵan Ashyq NQA portalynda jarııalanǵan qujatta.

Birjolǵy syıaqy myna mólsherde belgilenedi jáne tólenedi:

- QR Qylmystyq kodeksiniń 255-babynyń birinshi jáne ekinshi bólikterinde kózdelgen terrorızm aktisi týraly qylmystyq ister boıynsha -750 AEK (2 587 500 teńge);

- QR Qylmystyq kodeksiniń 255-babynyń úshinshi jáne tórtinshi bólikterinde kózdelgen terrorızm aktisi týraly qylmystyq ister boıynsha – 1 000 AEK (3 450 000 teńge).

Qujatta kórsetilgendeı, syıaqy aqparatty habarlaǵan adamnyń málimeti dáleldi jáne ol kináli adamǵa naqty qatysty bolsa ǵana tólenedi.

Buıryq jobasy 4 mamyrǵa deıin kópshilik talqylaýda bolady.