Terrorıstik jáne ekstremıstik qylmys jasaǵany úshin 34 adam sottaldy — UQK

ASTANA. KAZINFORM – Aqtóbe qalalyq sotynyń sheshimimen Aqtóbe oblysynyń bir turǵyny terrorızmdi nasıhattaǵany jáne atys qarýyn zańsyz saqtaǵany úshin kináli dep tanylyp, 9 jylǵa bas bostandyǵynan aıyryldy. Bul týraly UQK baspasóz qyzmeti habarlady.

UQK tergegen qylmystyq is sheńberinde, onyń aınalasyndaǵylardy lańkester jaǵynda sheteldegi soǵys qımyldaryna qatysýǵa shaqyrǵany, sonymen qatar ózi de olarǵa qosylýdy josparlaǵany anyqtaldy.

— Tintý barysynda odan 2 avtomat, 8 tapansha, 8 myltyq, 3 sholaq qarý, jasyryn tasymaldanatyn garnıtýrasymen 6 radıostantsııa, 3 tútin shashkasy, 1 jaryq granatasy jáne 581 patrony tabyldy, — delingen UQK habarlamasynda.

Sondaı-aq, UQK materıaly boıynsha Almaty oblystyq sotynyń sheshimimen Kaskeleń qalasynyń bir turǵyny terrorızmdi nasıhattaǵany jáne terrorıstik áreketterdi uıymdastyrýǵa adamdardy tartqany úshin 9 jylǵa bas bostandyǵynan aıyrylýǵa sottaldy.

Fıgýrant Qazaqstanda rezonansty zorlyq-zombylyq aktsııasyn jasaý úshin lańkestik top qurýdy josparlaǵan.

Osy maqsatta basqa dindar adamdarǵa lańkestik ıdeologııany qabyldatyp, olardy óz qataryna tartýǵa árekettengen.

— Jalpy osy jyldyń basynan UQK tergegen qylmystyq ister boıynsha terrorıstik jáne ekstremıstik qylmystar jasaǵany úshin ártúrli merzimge 34 adam, sondaı-aq 2 shetel azamaty sottalǵan. Olar terrorızmdi nasıhattaǵany, dinı arazdyq týdyrǵandyǵy, terrorıstik jáne ekstremıstik toptardyń áreketine tartqany, qurǵany jáne olarǵa qatysqany, tyıym salynǵan uıymdardyń áreketine qatysqany úshin kináli dep tanylǵan, — delingen habarlamada.

Taǵy 23 adamǵa qatysty tergeý jalǵasyp jatyr.

Aıta ketelik jyl basynan UQK polıtsııa jáne prokýratýra organdarymen birlesip 12 avtomat, 41 tapansha, 75 myltyq, 36 granata jáne ártúrli kalıbrdegi 1 603 oq-dári tárkiledi.