Terrorıstik jáne ekstremıstik qylmys jasaǵany úshin 17 adam sottaldy

ASTANA. KAZINFORM – Bıylǵy jyldyń basynan beri UQK tergep-teksergen qylmystyq ister boıynsha terrorıstik jáne ekstremıstik qylmys jasaǵany úshin 17 adam ár túrli merzimge bas bostandyǵynan aıyrý jazasyna sottaldy. Bul týraly UQK habarlady. 

Olardyń biri, Almaty qalasynyń turǵyny, 2017 jyly halyqaralyq terrorıstik uıymdar jaǵynda urys qımyldaryna qatysý úshin shetelge ketken.

2025 jyly sheteldik seriktestermen birlesken is-sharalar aıasynda ol shetelde ustalyp, Qazaqstanǵa arnaıy kúzetpen jetkizildi.

Terrorıstik áreketke qatysý faktisi boıynsha sot ony 8 jylǵa bas bostandyǵynan aıyrý jazasyna kesti.

Taǵy bir azamat, Kókshetaý qalasynyń turǵyny, 2013 jyly shetelge ketken. Internette terrorızm men dinı ekstremızm ıdeıalaryn nasıhattaǵan.

UQK sheteldik arnaıy qyzmetpen birlesip júrgizgen operatsııanyń nátıjesinde ustalyp, elge jetkizildi.

Sot sheshimimen terrorızmdi nasıhattaǵany jáne dinı alaýyzdyqty qozdyrǵany úshin 9 jyl 6 aıǵa bas bostandyǵynan aıyrý jazasyna kesildi.

Osy kezeń ishinde Astana, Almaty, Shymkent qalalarynda, Aqmola jáne Ulytaý oblystarynda terrorıstik qylmys jasaǵan 6 dinı radıkal ustaldy.

Sonymen qatar, bas bostandyǵynan aıyrý oryndarynda jazasyn ótep jatqan taǵy 4 adamǵa sottalǵandar arasynda terrorızmdi nasıhattady jáne dinı alaýyzdyqty qozdyrdy degen aıyp taǵyldy.

Olar ınternette jáne óz aınalasynda terrorıstik, ekstremıstik materıaldar taratqan, sondaı-aq olardyń ustanymdaryn qoldamaıtyndarǵa qatysty kúsh kórsetýge shaqyrdy dep kúdiktelip otyr.

Qylmystyq kodekstiń 174 jáne 256-baptary boıynsha sotqa deıingi tergep-tekserýler júrgizilip jatyr.

Qylmystyq-protsestik kodekstiń 201-babynyń 1-bóligine sáıkes ózge aqparat jarııa etýge jatpaıdy.

Aıta ketelik UQK úsh óńirde júrgizýshi kýáligin rásimdeýdegi jemqorlyq shemasyn áshkerelegen edi.