Terrorıstik jáne ekstremıstik oqıǵalardyń negizgi sebep-saldarlaryn anyqtaýda sarapshylar dármensizdik tanytýda - Amangeldi Aıtaly
ALMATY. 28 jeltoqsan. QazAqparat /Erlik Erjanuly/ - Elimizde bolǵan sońǵy terrorıstik jáne ekstremıstik oqıǵalardyń bárin birdeı syrtqy kúshtermen baılanystyrýdyń qajeti joq. Bul búgin Almatyda ótken "Terrorızm jáne ekstremızmmen kúres" dep atalatyn konferentsııada aıtyldy.
«Biz buryn turaqtylyqtyń, kelisimniń qamaly esebinde elimizde eshteńe bolmaıtyn sııaqty kórdik te, oǵan jete kóńil bólgen joqpyz. Eger mundaı qubylystar bolsa basqa shet elderde bolýy múmkin degen oıda boldyq. Búgin osyndaı jaǵdaı basymyzǵa kelgende bul máselege ǵalymdar da, saıasatkerler de daıyn bolmaı shyqty. Shyn máninde terrorologııa ózinshe bir ǵylym. Bul ilimniń tarıhı tamyry tereń. Bul qubylys ár memlekette ártúrli sebeptermen bolady. Onyń artynda kimder tur, qandaı kúshter tur, qarjy kózderi qandaı, ony tek dinnen kórý durys pa, bolmasa basqa da sebepteri bar ma degen máselelerge biz endi-endi ǵana mán berip jatyrmyz», - deıdi fılosofııa ǵylymynyń doktory Amangeldi Aıtaly.
Saıasattanýshy ǵalymnyń aıtýynsha, terrorızm bolsyn, ekstremızm bolsyn onyń sebebin ózimizdiń ishimizden izdeýimiz kerek. Biz sútteı uıyp otyrmyz, syrttan bizdiń aramyzǵa jik salyp, elimizdi búldirip jatyr desek ózimizge-ózimiz syn kózimen qaraýǵa múmkinshiligimiz bolmaıdy.
