Terrorıstik belsendilik aımaǵynan elge oralǵan áıelderdiń 90% ońaltýdan ótti
E.Núkejanov 2020 jylǵy din salasyndaǵy jumys nátıjeleri jáne vedomstvo aldyna bıyl qoıylǵan mindetter týrasynda aıtty.
Komıtet qyzmetiniń strategııalyq baǵyttary eń aldymen, el damýynyń zaıyrlylyq qaǵıdattaryn nyǵaıtýǵa, úılesimdi konfessııaaralyq qatynastardy qamtamasyz etýge jáne halyq arasynda dinı ekstremızm ıdeologııasynyń taralýyna qarsy is-qımylǵa baǵdarlanǵan. Bul baǵyttar 2020 jyldyń sońynda qabyldanǵan din salasyndaǵy memlekettik saıasatty iske asyrýdyń 2021-2023 jyldarǵa arnalǵan keshendi josparynda kórsetilgen. Onyń sheńberinde eldegi dinı ahýaldyń turaqtylyǵyn qamtamasyz etý jónindegi jumystar júrgiziletin bolady.
Komıtet tóraǵasy atap ótkendeı, 2020 jyly dinı qyzmet salasyndaǵy 7 memlekettik qyzmettiń 6-aýy elektrondyq formatqa aýystyryldy. Endi olardy egov.kz portalynda alýǵa bolady. 2021 jyly osy saladaǵy barlyq memlekettik qyzmetterdi 100% avtomattandyrýdy qamtamasyz etý josparlanýda.
Sondaı-aq ol destrýktıvti dinı aǵymdardyń 3 myńnan astam ustanýshysy qazaqstandyq qoǵamnyń dástúrli qundylyqtaryna qaıta oralǵanyn, terrorıstik belsendilik aımaǵynan elimizge oralǵan áıelderdiń 90% ońaltýdan ótkenin, sońǵy 3 jyl ishinde bilim berý mekemelerinde hıdjab taǵý faktileriniń sany 12 eseden astam tómendegenin habardar etti. Budan bólek, din máseleleri boıynsha 229 aqparattyq-túsindirý tobynyń qyzmeti jóninde málim etildi.
E.Núkejanovtyń aıtýynsha, dinı radıkaldy ıdeologııanyń ınternet arqyly taralýyna qarsy turýǵa erekshe kóńil bólinedi. 2020 jyly áleýmettik jelilerde destrýktıvti dinı aǵymdar ıdeologııasyn nasıhattaıtyn radıkaldy toptarda tirkelgen qazaqstandyqtardyń sany 2019 jylmen salystarǵan 44% azaıyp, 21 myńnan astam radıkaldy materıaldar joıylǵan jáne buǵattalǵan.
Sonymen qatar vedomstvo tóraǵasy jemisti memlekettik-konfessııalyq yntymaqtastyq týraly aıtyp, pandemııa jáne karantın rejımi kezeńinde memleketke kórsetken qoldaýy úshin Qazaqstannyń dinı birlestikteriniń ókilderine alǵys bildirdi.
