Terrorıstik bappen ustalǵandar polıtsııaǵa qarsy shyqpaq bolǵan - Almaty polıtsııasy

ALMATY. QazAqparat - Almaty polıtsııasy brıfıng kezinde terrorıstik áreket jasamaq boldy degen kúdikpen ustalǵandardyń qandaı maqsaty bolǵanyn aıtty, dep habarlaıdy QazAqparat tilshisi.

Qalalyq ІІD-niń resmı ókili Saltanat Ázirbektiń aıtýynsha, tergeý barysynda kúdikti Jumaǵulov, Omyrov, Ábishevter quqyq qorǵaý organdaryna qarsy búlik shyǵarmaq bolǵany anyqtaldy.

«Tergeý barysynda Jumaǵulov basqarǵan top quqyq qorǵaý organdary men memlekettik qurylymdarǵa qarsy qarsylyq uıymdastyrmaq bolǵanyn dáleldeıtin derekter tabyldy. Sonymen qatar, olar polıtsııa qyzmetkerlerine qońyraý shalyp, otbasy múshelerin qorqytpaq bolǵan. Bet-aýyzdaryn búrkep memlekettik organ basshylarynyń atyna vıdeohabarlama jiberýdi josparlaǵan», - dedi S.Ázirbek.

Uıymdastyrýshy jeke kásipkerlerdiń qarjysyna qylmystyq topty qarjylandyrýdy kózdegen.

«Jumaǵulov aqshany bopsalaý arqyly tabýdy josparlaǵan. Osy maqsatta Qyrǵyzstannan myltyq satyp alǵan. Ol barlyq kináni moınyna alatyn adam izdeýmen aınalysqan. Olardan uıaly telefondar men sım-kartalar tabylǵan», -  dedi Saltanat Ázirbek.

Kásipkerlerdi bopsalaýdan túsken aqshamen Jumaǵulov quqyq qorǵaý organdarynyń qyzmetkerlerine qarsy belsendi shabýyl jasamaq bolǵan.

Aıta ketý kerek, 25 qarashadan bastap qalalyq ІІD Jumaǵulov, Omyrov, Ábishevke qatysty qylmystyq isti tergep jatyr. Kúdiktilerge QR QK 256-baby «Terrorızmdi nasıhattap, terrorızm aktisin jasaýǵa ashyq túrde shaqyrdy» degen aıyp taǵylyp otyr.