Terrorıstik áreketterdiń Islamǵa esh qatysy joq - Tájikstan múftıi

ASTANA. QazAqparat - Bul týraly búgin Álemdik jáne dástúrli dinder kóshbasshylary VI sezi aıasyndaǵy «Qubylmaly geosaıası jaǵdaıdaǵy dinder: adamzatty toptastyrý úshin jańa múmkindikter» atty sessııasynda Tájikstan Respýblıkasynyń múftıi Saıdmýkarram Abdýkodırzode aıtty, dep habarlaıdy QazAqparat tilshisi.

«Osy kúnderi terrorızm týraly kóptegen áńgime órbittik. Barlyǵymyzdyń oıymyz bir jerden shyǵyp otyr. Ol - jer sharynyń túkpir-túkpirinde bolyp jatqan terrorızmge tosqaýyl qoıý. Terrorızm - bul qylmys. Onymen kúresý úshin túrli deńgeıde konferentsııalar ótkizilip, mundaı qylmystyń túp-tamyryna balta shabý máselesi jan-jaqty pysyqtaldy. Bul problema álem deńgeıinde óte qaýipti qubylysqa aınala túsken. Sondyqtan ony tereń zerdeleýmiz kerek», - dedi ol.

Onyń aıtýynsha, terrorızm ıdeıalaryn tereń túsingen jaǵdaıda ǵana oǵan tosqaýyl qoıýǵa bolady. Jalpy búginde terrorızm jastar arasynda beleń alýy da alańdatyp otyr.

«Terrorızmdi ıslammen baılanystyrmaý qajet. Ony ıslammen baılanystyrý úlken qatelik. Terrorıstik toptardyń jasap jatqan áreketteriniń ıslamǵa esh qatysy joq. Sebebi ıslam, zorlyq-zombylyqtan, terrorızmnen alshaq turady. Islam beıbitishilik, kelisim dini», - dedi Tájikstan múftıi.

Sóz sońynda Saıdmýkarram Abdýkodırzode Alla Taǵaladan Qazaqstanǵa beıbitshilik pen shynyshtyq tileıtindigin basa aıtty.

Aıta keteıik, Astanadaǵy Beıbitshilik pen kelisim saraıynda Álemdik jáne dástúrli dinder kóshbasshylarynyń VI sezi ótip jatyr.