Terrenkýrdaǵy zańsyz qurylysqa jospardan tys tekserý júrgiziledi - Almaty ákimdigi

ALMATY. QazAqparat – Almaty ákimdigi Terrenkýrdaǵy zańsyz qurylysqa egjeı-tegjeıli túsinik berdi, dep habarlaıdy QazAqparat tilshisi.

Almaty ákimdigi Rýbınshteın kóshesi, 38/1 mekenjaıynda jalpy aýdany 30 sotyq jer ýchaskesi jeke turǵyn úı qurylysy nysanaly maqsatymen 2000 jyly jeke menshikke berilgenin habarlady.

«Ótken jyly 29 maýsymda azamattyq-quqyqtyq mámile negizinde jer ýchaskesin N.A. Týlaeva jáne M.B. Mashkalov satyp aldy. 2022 jylǵy jeltoqsanda jer ýchaskesiniń alańy 10 jáne 20 sotyq bolyp eki táýelsiz jer ýchaskesi bolyp segmenttelgen, ıaǵnı, bólingen», - dep habarlady ákimdik.

Aýdannyń egjeı-tegjeıli josparlaý josparyna sáıkes, 10 sotyq jer ýchaskesi úı qurylysy aımaǵynda, 20 sotyq ýchaske kommertsııalyq jáne turǵyn úı obektilerin salýǵa tyıym salynǵan sý qorǵaý beldeýinde ornalasqan.

Aıta keteıik, Terrenkýr boıyndaǵy sý qorǵaý beldeýi sý jıeginiń eki jaǵynda 35 metrdi quraıdy.

3 sáýir kúni qala qurylysyn baqylaý basqarmasynyń ınspektory jalpy alańy 10 sotyq ýchaskedegi barlyq qurylys-montaj jumystaryn (qoldanystaǵy qurylysty bólshekteý) toqtatty.

Menshik ıesiniń bólshekteý jumystary obektilerdi keıinnen kádege jaratý jónindegi jumystar keshenin júrgizýge sheshim berilmeı turyp bastalǵan bolatyn.

Qazirgi ýaqytta menshik ıesine qatysty jospardan tys tekserý bastalǵaly otyr, onyń nátıjesi boıynsha qurylys-montajdaý jumystaryn toqtata turý jáne jiberilgen buzýshylyqtardy joıý týraly nusqama berile otyryp, QR ÁQBtK 316-baby 1-bóligi «jobalaý qujattamasynsyz ne saraptama júrgizý talap etiletin, belgilengen tártippen saraptamadan ótkizilmegen jobalaý (jobalaý-smetalyq) qujattamasy boıynsha salý (rekonstrýktsııalaý, restavratsııalaý, keńeıtý, tehnıkalyq qaıta jaraqtandyrý, jańǵyrtý, kúrdeli jóndeý)» boıynsha ákimshilik shara qabyldanady.

«Zańsyz bastalǵan qurylys-montaj jumystaryna baılanysty Almaty ákimdigi qurylysqa jobalaý aldyndaǵy qujattamanyń berilmeýi máselesin pysyqtap jatyr. Budan basqa, oıyn alańyn saqtaý jáne Terrenkýr boıyndaǵy jańa qurylysty boldyrmaý maqsatynda satyp alý jolymen alańy 20 sotyq aralas jer ýchaskesin memleketke qaıtarý máselesi sheshilýde. Bul jer ýchaskesin memleketke qaıtarý máselesi 7 sáýirde Almaty qalasy jer komıssııasynyń taıaýdaǵy otyrysynda qaralady», - dep málimdedi ákimdik.

Eske salaıyq, buǵan deıin almatylyqtar Terrenkýrda júrip jatqan qurylysqa narazylyq bildirgen bolatyn.