Termııalyq kúıik: Almatyda aıaq-qoly tyrysyp qalǵan balalarǵa ota jasaldy
ALMATY. KAZINFORM — Almatyda № 2 qalalyq balalar klınıkalyq aýrýhanasynyń bazasynda aýyr kúıigi men tyrtyǵy bar balalarǵa ota jasaldy.
Qoldyń termııalyq kúıigin alǵan 4 jasar Serik Múslimniń bas barmaǵy tyrysyp qalǵan. Saldarynan alaqanyn tolyq asha almaıdy.
Sheberlik dárisi aıasynda kishkentaı naýqasqa otany aıaq-qol mıkrohırýrgııasy boıynsha álemdik deńgeıdegi maman, máskeýlik dáriger Igor Golýbev pen № 2 qalalyq balalar klınıkalyq aýrýhanasynyń dárigerleri jasady.
«Aýyr kúıik saldaryn joıý úshin balaǵa birneshe jyl buryn ota jasalǵan bolatyn. Endi qanmen qamtamasyz etilgen tindi aıaqtaǵy kúretamyrǵa transplantatsııalaý qajet boldy. Biz sol operatsııany jasadyq. Ota sátti ótti. Qoldaǵy kemistik joıyldy, — deıdi № 2 QBKA travmatolog-dárigeri Uljan Soltanbekova.
Taǵy bir kishkentaı naýqas — Aıǵanym Nurbekqyzy. Onyń aıaq-qoly qaınaǵan sýǵa kúıip qalǵan. Keıin jaralar tolyq jazylmaı, baqaıynyń búgilýine kedergi keltiretin tyrtyq paıda bolǵan.
«Otadan soń qyzdyń oń tizesiniń býyny búgiletin boldy. Qazir Aıǵanym qozǵala alady, otadan keıingi qalpyna kelý em-sharasyn qabyldap jatyr», — deıdi dárigerler.
Jalpy sheberlik dárisi aıasynda tórt balaǵa operatsııa jasaldy.
«Bul joly emdelýi óte qıyn jáne deneniń basqa jerinen tinderdi engizýdi qajet etetin kúıik saldaryn joıýmen aınalystyq. Atap aıtqanda, keshe biz ystyq peshti qolymen ustap alyp, barlyq saýsaǵy byrysyp kúıip qalǵan balaǵa ota jasadyq. Biz barlyq klınıkada kezdespeıtin eksklıýzıvti tehnologııa qoldanamyz. Balalarmen jáne sezimtal tindermen jumys jasaýda ár mıllımetr mańyzdy ról atqarady, bizdegi barlyq klınıkalyq jaǵdaıdyń sırek kezdesetinin eskersek, árbir ota ózinshe erekshe», — dedi Máskeý qalasyndaǵy Reseı halyqtar dostyǵy ýnıversıtetiniń travmatologııa jáne ortopedııa kafedrasynyń professory Igor Golýbev.
Qazir ota jasalǵan barlyq balanyń jaǵdaıy jaqsy.
Dárigerler 7-10 kún boıy statsıonar jaǵdaıynda baqylap, keıin olardy birtindep aýrýhanadan shyǵaratynyn aıtty.
