Termınkom múshelerin termınator sekildi kórýdiń qajeti joq - Til komıtetiniń tóraǵasy
ASTANA. Qyrkúıektiń 3-i. QazAqparat /Gúlmıra Álıakparova/ - Tóńiregimizde turpaıy sóz kezdesse ony Termınkomnan kórip, Termınkom múshelerin termınator sekildi kórýdiń qajeti joq. Bul pikirin búgin Astana qalasy ákimdiginde Tilderdi qoldaý men damytýdyń 2011-2020 jyldarǵa arnalǵan memlekettik baǵdarlama jobasyn qoǵamdyq talqylaý barysynda QR Mádenıet mınıstrligi Til komıtetiniń tóraǵasy Baýyrjan Omarov bildirdi.
Shara barasynda baıandama jasaǵan B.Omarov, atalmysh memlekettik baǵdarlamanyń «damyǵan til mádenıeti - zııaly ulttyń kúsh-qýaty» dep atalatyn tórt maqsattarynyń birine toqtalyp, ol eń aldymen termınologııa men onomastıka salasyndaǵy jumystardy jaqsartýdy, qazaq tiliniń leksıkalyq qoryn odan ári jetildirýdi kózdeıtinin atap ótti.
«Qazir ataý sózderimiz ártúrli qoldanylady. Termınderimizdiń keıbiri tórt aıaqtap jatyr. Tóńiregimizdiń bári, turpaıy sóz kezdesse Termınkomnan kóredi. Ol bekitildi me, joq pa, onda sharýasy joq. «Qyltıma», «bultıma», «shaptyrma» degen sekildi anaıy sózderdi taýyp, pálen degen uǵymnyń balamasy-mys, ǵalymdar solaı aýdarypty dep attandap shaýyp júrgender bar. Termınkom olaı aýdarmaıdy. Onyń quramynda qazaqtyń aqyl-oıy sanalatyn azamattar otyr. Al ulttyń aqyl-oıy op-ońaı aýysyp kete salmaıdy. Olar múmkindiginshe halyqaralyq termınderdi saqtaıdy. Eger aýdarý qajet bolsa, qazaq tilindegi balamasyn dál tabýǵa tyrysady», - dedi ol.
B.Omarovtyń sózine qaraǵanda, másele, Termınkomnyń sheshimi keńesshilik sıpatta qabyldanatyndyǵynda bolyp otyr. Sondyqtan tıisti oryndar ony jappaı qoldana bermeıdi. «Endi Termınkom maquldaǵan ataýlardy Úkimet qaýlysymen bekitip, mindetti sheshimge aınaldyrý kózdeledi», - dep túıindedi sózin Komıtet tóraǵasy.
