Termınderdi tańdaǵanda basshylyqtyń bedeli basym bolyp ketedi - Sherýbaı Qurmanbaıuly

NUR-SULTAN. QazAqparat - Professor Sherýbaı Qurmanbaıuly termınderdiń utymdy nusqasyn tańdaǵanda adamı faktorǵa jol bermeýge úndedi, dep xabarlaıdy QazAqparat tilshisi.

Ǵalymnyń aıtýynsha, búginde ǵylymı turǵyda utymdy ári sátti aýdarylǵan termınderdi suryptaý jumysy durys jolǵa qoıylmaǵan.

«Jaqsy termınder jasalady. Sala mamandary izdenedi. Ózderiniń maqalasynda jazady, sózdigine, oqý quralyna engizedi. Biraq solardy jınaqtap, suryptaý, sala mamanynyń usynǵan on balamasynyń ishinen eń utymdy jaǵyn tańdap alý jolǵa qoıylmaǵan. Ashyǵyn aıtý kerek, keıde jeke adamnyń faktory da áser etedi. Eger aǵa býyn ǵalym ókili bolsa, sonyń aıtqan sózi, nemese memlekettik qurylym bolsa, sol jerde otyrǵan laýazymdy basshynyń bedeli men salmaǵyna basymdyq beriledi de, lıngvıstıkalyq faktor, norma, tildik talap, termınniń utymdy jasalǵandyǵy, kóńilge qonymdylyǵy sııaqty faktorlar ekinshi planǵa ysyrylyp ketedi. Biz kásibı turǵyda qaraýymyz qajet. Bul jerde ǵylymı etıka men ǵylymı mádenıet máselesi bar», - dedi Sh.Qurmanbaıuly QR Parlament Májilisinde ótken ǵylymı-praktıkalyq konferentsııada.

Aıta keteıik, búgingi jıynda professor Sherýbaı Qurmanbaıuly termınologııanyń ózekti máselelerin atap ótti. Osy oraıda ǵalym termınkomnyń quzyretin kúsheıtý kerek dep sanaıdy.
Al, Axmet Baıtursynov atyndaǵy Til bilimi ınstıtýtynyń dırektory, professor Erden Qajybek termınologııa sózdikterin shyǵarý josparyn jarııa etti.