Termınderdi aýdara berýdiń saldarynan mamandar qınalyp júr - Q.I. Sátbaev atyndaǵy QazUTÝ rektory
ASTANA. QazAqparat - Termınderdiń barlyǵyn birdeı aýdara berýdiń reti joq. Bul týraly búgin QR Prezıdenti atyndaǵy Ortalyq kommýnıkatsııalar qyzmetinde ótken baspasóz máslıhatynda Q.I. Sátbaev atyndaǵy Qazaq ulttyq tehnıkalyq ýnıversıtetiniń rektory Jeksenbek Ádilov málim etti.
«Biz damyǵan 30 eldiń quramyna enýimiz úshin tehnıka jáne tehnologııa salasynda mamandar daıarlaýǵa erekshe mán berýimiz kerek. Bul turǵyda bir problema bar. Mysaly, bizdiń ýnıversıtette stýdentterdiń 70 paıyzy qazaq tilinde oqıdy. Biraq, qazirgi kezde olar úshin júıeli termınder joq. Atap aıtqanda, termınderdi Shyǵys elderi ózderinshe, al Batys ózinshe aýdarady, sondaı-aq termınderdi elimizde de aýdaryp jatamyz. Osy oraıda memlekettik emtıhandarda keıbir kezderde stýdentter kóp suraqtardy túsinbeı jatady», - dedi rektor.
J. Ádilovtiń sózine qaraǵanda, oqý ornyn támamdaǵandar elimizdegi sheteldik tehnologııalyq kompanııalarǵa jumysqa ornalasý kezinde termınder boıynsha qınalatyn kórinedi. «Alaıda, stýdentterimiz jazý-syzý turǵysynda barlyǵyn jetik túsindirip beredi. Bul turǵyda menedjerler (sheteldik) bizdiń kemshilikterimizdi jıi aıtady. Olardyń paıymynsha, Qazaqstanda barlyq termınderdi aýdarýdyń saldarynan mamandar jumysynda qıyndyqtar týyndaıdy. Óıtkeni, barlyq salalarda termınder bir tilde bolýy kerek. Sondyqtan da byltyr tehnıkalyq salada mamandar daıarlaıtyn JOO-lardyń rektorlaryn jınap, termınder boıynsha bir júıe bolýy kerek degen kelisimge keldik», - dep toqtaldy JOO basshysy.
Sóz sońynda ol tehnıka salasynda qazaq tilindegi oqýlyqtar tapshylyǵy qatty sezilip otyrǵandyǵyn atap ótti.
