Terme báıgesiniń bas júldesi - avtokólik
ASTANA. 5 qyrkúıek. QazAqparat - Búgin «Áziret Sultan» meshiti terme báıgesin jarııalady.
Báıgeniń sharttary: báıge termeniń jańadan jazylǵan mátinine jarııalanady. Júldeler mátinniń maǵynalyq tereńdigine saı beriledi. Mátinniń oıy tereń, sózi ótkir, terme tabıǵatyna saı bolýy lázim. Taza dinı sarynda bolýy shart emes. Sebebi, terme ulttyq, rýhanı jáne dinı baǵytta. Termeniń maqamy men jetkize oryndaý sheberligi de eskeriledi. Terme mátinin jazǵan adam onyń maqamyn shyǵartyp, daýysy kelisti adamǵa oryndatýyna da bolady. Oryndaýsyz jiberilgen terme mátininiń qur ózi qabyldanbaıdy. Báıgege usynylatyn shyǵarmalar qarashanyń 20-syna deıin jiberilýi kerek. Ádil qazylar alqasynyń esimi barmaq basty, kóz qysty, bura tartý bolmas úshin jarııalanbady.
Báıgege qatysýshylar úshin usynylatyn taqyryptar: «Otandy súıý - ımannan», «Men - Qazaqpyn, musylmanmyn álimsaqtan», «Amanat bolyp jetken Jer», «Muhammed - adamzattyń ardaqtysy», «Qazaqtyń qazaqtyǵy tilinde tur», «Dástúri ólgen ulttar joǵalady», «Ǵylymǵa moınyńdy bur, ımandy urpaq», «Álemdi selt etkizgen erler ótken», «Ósıet aıttym urpaqqa», «Azattyǵy úshin elimniń, jan menen bas sadaǵa», «Nasıhat aıttym kelinge», «Ata-anańdy qadirle tirisinde», «Ne jaqsy? Ne jaman?», «Jaqsy adamnyń minezi kórkem bolar».
Bas júldege sheteldik avtokólik tigiledi. Al birinshi orynǵa 1 mıllıon 500 myń teńge beriledi. Ekinshi orynǵa ıe bolǵandardy da renjitpeıtin júlde bar. ıAǵnı, 750 myń teńgeden eki adamǵa beriledi. Al úshinshi orynǵa ıe bolǵan úsh adamǵa 500 myń teńgeden buıyrady. Budan basqa yntalandyrý syılyqtary da bar. Ol - kishi qajylyq, bes adamǵa.
«Elbasy Nursultan Nazarbaev «Áziret Sultan» meshitiniń ashylý saltanatynda: «Áziret Sultan» meshiti tek qana qulshylyq orny emes, bas meshit iri rýhanı jáne mádenı-aǵartý ortalyǵy bolýy tıis», - deýi arqyly Prezıdentimiz dinimizdiń aldaǵy jumysy osy baǵytta damýy qajet ekenin meńzedi. Osy oraıda «Áziret Sultan» meshiti ultymyzdyń rýhanı tárbıe quraly, qazaqy pálsapa men danyshpandyqtyń kózi, ulttyq ónerimiz - termege báıge jarııalap otyr», - dedi «Áziret Sultan» meshitiniń bas ımamy Qaırat Joldybaıuly. Onyń aıtýynsha, qazaq halqy Islam dinin árqashan óziniń ónerimen sabaqtastyryp, dástúrimen ushtastyra bilgen halyq. Urpaǵyna, bala-shaǵasyna nasıhatty maqal-mátel, jyr-dastan, hıkaıalarmen jáne termelermen jetkize bilgen. Qazaqqa jaı sózden góri jyr-termeler qymbat. Sebebi, qazaqtyń jyr-termeleriniń barlyǵy - úgit-nasıhat. Mine, osy dúnıelerdi eskergen meshit osyndaý aýqymdy sharany qolǵa alýǵa bel býyp otyr.
