«Terisaıryq» zastavasyn óz erkimen tastap ketken 11 shekarashyǵa qatysty qylmystyq is qozǵalǵan joq - Bas áskerı prokýratýra
ASTANA. 4 qyrkúıek. QazAqparat - «Terisaıryq» shekara zastavasyn óz erikterimen tastap ketken 11 shekarashyǵa qatysty qylmystyq is qozǵalǵan joq.
Bul týraly búgin jýrnalıstermen ótken brıfıngte QR Bas áskerı prokýratýrasy 4-shi basqarmasynyń aǵa prokýrory Jeńis Temekov málim etti.
«Terisaıryq» shekara zastavasyn óz erkimen tastap ketken 11 shekarashyǵa qatysty qylmystyq is qozǵaýdan bas tartý týraly qaýly qabyldandy. Olar qylmystyq is boıynsha jábirlenýshi bolyp tanyldy. Sondyqtan da, osy qylmystyq is barysynda olar jábirlenýshiler retinde qaralatyn bolady», - deıdi Jeńis Temekov.
Onyń aıtýynsha, shekarany óz erikterimen tastap ketken 11 shekarashynyń áreketteri qarastyrylatyn qylmystyq baptaǵy siltemege sáıkes, ondaı tulǵalarǵa aıypty jeńildetetin jaǵdaılar qamtylǵan. «Bul tulǵalar ózderiniń basshylary tarapynan bılikteri men qyzmettik ókilettikterin asyra paıdalanýdyń saldarynan shekara zastavasyn tastap ketti delinip otyr. Sondyqtan da, 11 shekarashyǵa qatysty qylmystyq is qozǵaýdan bas tartyldy», - dedi J. Temekov.
Eske sala ketsek, 31 tamyzda Ulttyq qaýipsizdik komıteti Shekara qyzmetiniń 2017 áskerı bóliminiń kelisim-shart boıynsha áskerı qyzmetshileri aǵa serjant J. Qajenovty, kishi serjant E.Turdyǵulovty QR Qylmystyq kodeksiniń 380-1 baby 2 bóligi «a» tarmaǵymen, «Terisaıryq» shekara zastavasynyń bastyǵy aǵa leıtenant A.Hamıtovty Qazaqstan Respýblıkasy Qylmystyq kodeksiniń 380-1 baby 2 bóligi «v» tarmaǵymen qylmys jasaǵany boıynsha aıyptaý týraly qylmystyq is qozǵap, ony Óskemen garnızonynyń áskerı sotyna joldanǵan bolatyn. Qylmystary moıyndalsa, atalǵan tulǵalarǵa 5-ten 10 jylǵa deıin bas bostandyǵyn aıyrý jazasy berilýi múmkin.
