«Terisaıryq» shekara zastavasynyń bastyǵy men eki qyzmetshiniń isi sotqa joldandy
ASTANA. 3 qyrkúıek. QazAqparat - Óskemen garnızonynyń áskerı sotyna Shyǵys Qazaqstan oblysy «Terisaıryq» shekara zastavasynyń bastyǵy men kelisim-shart boıynsha eki áskerı qyzmetshiniń isi joldandy.
Eske salsaq, atalǵandardyń zańsyz áreketteri 11 sarbazdyń qashýyna jol bergen delingen bolatyn. Bul týraly Bas áskerı prokýratýranyń baspasóz qyzmetinen habarlandy.
«2012 jylǵy 31 tamyzda Ulttyq qaýipsizdik komıteti Shekara qyzmetiniń 2017 áskerı bóliminiń kelisim-shart boıynsha áskerı qyzmetshileri aǵa serjant J.O.Kajenovty, kishi serjant E.Ý.Turdyǵulovty Qazaqstan Respýblıkasy Qylmystyq kodeksiniń 380-1 baby 2 bóligi «a» tarmaǵymen, «Terisaıryq» shekara zastavasynyń bastyǵy aǵa leıtenant A.B.Hamıtovty Qazaqstan Respýblıkasy Qylmystyq kodeksiniń 380-1 baby 2 bóligi «v» tarmaǵymen kórsetilgen qylmys jasaǵany boıynsha aıyptaý týraly qylmystyq is Bas áskerı prokýratýramen negizinen qaraý úshin Óskemen garnızonynyń áskerı sotyna joldandy», - delingen habarlamada.
Eske sala ketsek, 18 maýsymda «Shyǵys» óńirlik basqarmasy Zaısan shekara jasaǵy «Terisaıyryq» shekara zastavasynyń jedel qyzmettegi 11 áskerı qyzmetkeri óz erikterimen zastava aýmaǵynan ketip qalǵan bolatyn. Al olardyń ketip qalǵanyn bilgen zastavanyń basshysy óz erkimen izdeý jumystaryn uıymdastyrmaqqa árekettengen, basshylyqqa oryn alǵan tótenshe jaǵdaı týraly tek keshke qaraı málimdegen.
