Teris pıǵyldy dinı aǵymdardyń áleýmettik-saıası astary bar
Kolledjdegi dáris tanysýdan bastaldy.Taqyryp aýqymdy ári kúrdeli bolǵandyqtan lektor dáristi ózgeshe formatta ótkizdi. Jastarmen ashyq dıalog qurdy. Aldymen stýdentterge sen kimsiń degen jalpy suraq qoıyldy.
Jastar talasa jaýap berdi. Biri adammyn dese, endi biri QR azamatymen dedi.
«Durys aıtasyzdar birinshiden biz bárimiz adambyz. Sonymen birge, bizdiń Qazaqstan Respýblıkasynyń azamaty ekendigimiz mańyzdy! Álemdegi ár memleket óz azamattarynyń quqyǵyn qorǵaıdy. Qazaqstanyń basty baılyǵy –halyq. Bizdiń el turǵyndarynyń quqyǵy tolyqtaı qorǵalǵan. Sondaı-aq, dinine, diline, salt-dástúrine shekteý qoımaıdy. Alaıda osyny jat aǵymdaǵylar teris pıǵylda paıdalanyp júr»,- deıdi Erkin Tastanqulov.
Erkin Tastanqulovtyń aıtýynsha, qazirgi jastardyń maqsaty aıqyn, mindetteri belgili, armandary asqaq. Alaıda, bári biz oılaǵandaı bolmaıdy. Ómirde túrli qıyndyqtar kezdesedi, jumysymyzda keleńsiz jáıtter oryn alyp, oqýda qıyndyqtar týyndaýy múmkin. Dál osy kezde adam depressııaǵa ushyraıdy, kóńili túsedi.
«Osyndaı kúıge túsken adamdardy destrýktıvti aǵymdar ózderine tartady. Aıaýshylyq tanytyp, kómekke keledi. Ártúrli tásildi qoldanady. Áleýmettik jaǵynan da kómektesýi múmkin. Teris aǵymynyń arbaýyna kóbine jastar túsip qalady. Keıin olar dostaryna, týystaryna tipti memleketke de qarsy shyǵýy múmkin. Munyń sońy jaqsylyqqa ákelmeıdi, kerisinshe qaıǵyly aıaqtalýy múmkin»,- deıdi lektor.
Táýelsiz Qazaqstannyń qysqa ǵana tarıhynda elimizdiń din salasy kóptegen ózgeristerge ushyrady. Dinniń atyn jamylǵan aǵymdar men toptar dinı saýaty az azamattarymyzdy óz qarmaqtaryna túsirip, tipti ózderine belsendi jaqtasqa aınaldyryp, ózimizge qarsy qoıyp úlgerdi.
«Sol sebepti adamdardy týra joldan taıdyratyn toptar men aǵymdardy destrýktıvti (bul sóz latyn tilinen aýdarǵanda «qulatý», «qalyptasqan júıeni buzý» degen maǵynany bildiredi) ıakı teris pıǵyldy dep ataımyz. Alaıda bul aǵymdaǵylar ózderin shynaıy dindar jáne aqıqat jolyndaǵylar retinde sanaıtyndyqtan, olardyń qatary áli de bolsa kóbeıý ústinde. Halqymyz «ishten shyqqan jaý jaman» demekshi, mundaı kózqarasty ustanýshylar Islamnyń atyn jamylatyndyqtan, tek qana atyn jamylý emes, tipti dinı mátinderden (Quran jáne hadıs) ózderiniń isterine dálel keltiretindikten, olarmen kúres basqa jat dinı aǵymdarmen kúresýden qaraǵanda óte qıyn. Qazir elimizdiń din salasynda eleýli ózgerister oryn alyp, dinı birlestikter qaıta tirkeýden ótip, dinı aǵymdar men birlestikter sanynda birshama azaıýy baıqaldy»,- dep qosty Erkin Tastanqulov.
Joǵary medıtsınalyq kolledj stýdentteri dáris barysynda dinı ekstremızm men terrorızm, destrýktıvti kýlt týraly kóptegen maǵlumat aldy.
«Bizge búgingi dáris unady. Biz oıymyzdy ashyq aıttyq. Aǵaı bizge bárin jaqsylap túsindirip berdi. Mundaı jolǵa jastardyń túsip ketetini ókinishti. Alaıda osy sala mamandary jastarǵa túsindirý jumystaryn mysal keltirip, úǵynyqty tilmen jetkizse onyń aldyn alýǵa bolady dep oılaımyn»,- deıdi dáriske qatysqan stýdent.
Eske sala keteıik, aqparattyq túsindirý jumystary men mamandardyń JOO men kolledj stýdenterine dáris oqýy Almaty qalalyq Qoǵamdyq damý basqarmasynyń uıymdastyrýymen ótip jatyr. Joǵary medıtsınalyq kolledjdegi dáriske 300-ge jýyq stýdent qatysty.
