Teris áreketi úshin laýazymynan bosaǵan Konstıtýtsııalyq Sot sýdıalary zeınetaqy jarnasyn qaıtarady

ASTANA. QazAqparat – Teris áreketi úshin qyzmetinen bosatylǵan Konstıtýtsııalyq Sottyń sýdıalarynan jumys istegen aralyǵynda aýdarylǵan zeınetaqy jarnalary qaıtarylady. Premer-Mınıstr Álıhan Smaıylov tıisti qaýlyǵa qol qoıdy, dep habarlaıdy QazAqparat tilshisi.

«Qosa berilip otyrǵan sýdıa teris sebepter boıynsha laýazymynan bosatylǵan jaǵdaıda QR Konstıtýtsııalyq Sotynyń sýdıalary, sýdıalar úshin qosymsha belgilengen mindetti zeınetaqy jarnalarynyń somalaryn alyp qoıý jáne bıýdjetke aýdarý qaǵıdalary bekitilsin», - delingen Úkimet basshysy qol qoıǵan qaýlyda.

Qoldanysqa engiziletin zań talabyna saı, zeınetaqy aýdarymdaryn keri qaıtarý isimen sot ákimshiligi salasyndaǵy ýákiletti memlekettik organ aınalysady. Ol sýdıany teris áreketi úshin jumystan bosatý týraly Prezıdent Jarlyǵy nemese Parlamenti Senatynyń qaýlysy shyqqanan keıin 5 jumys kúni ishinde «Azamattarǵa arnalǵan úkimet» memlekettik korporatsııasy arqyly BJZQ-ǵa ótinish joldaıdy. Onyń ishinde tıisti shara qoldanylyp otyrǵan adam týraly derekter men shottan qaıtarylýy tıis zeınetaqy jarnasynyń somasy kórsetiledi.

«Elektrondyq ótinim aqparatty jetkizýdiń avtomattandyrylǵan qarjylyq júıesi arqyly Biryńǵaı jınaqtaý zeınetaqy qoryna (BJZQ) jiberiledi. BJZQ Memlekettik korporatsııadan mindetti zeınetaqy jarnalarynyń somalaryn alyp qoıýǵa arnalǵan elektrondyq ótinimdi alǵan kúnnen bastap 5 jumys kúni ishinde Memlekettik korporatsııa ótiniminiń nómiri men kúnin kórsete otyryp, mindetti zeınetaqy jarnalarynyń somalaryn aýdarýdy júzege asyrady», - delingen jańa erejede.

Bul talaptar 1 shildeden bastap kúshine enedi.