Teridegi súıel men papılloma onkologııalyq aýrýǵa ákelýi múmkin
Dárigerdiń aıtýynsha, qazirgi ýaqytta «Teri qaterli isiginiń sebebi nede?» degen suraqqa birde-bir jaýap joq. Dese de, boljamdy birneshe faktor bar, olardyń bolýy isiktiń týyndaý qaýpin arttyrady. Oǵan mynalar jatady: tuqym qýalaýshylyq, qolaısyz ekologııa, asqynǵan teri aýrýlary jáne taǵy basqalary.
Sonymen qatar maman obyrdy erte anyqtaý onkologııalyq aýrýlarmen kúresýde mańyzdy ról atqaratynyn atap ótti.
«Bala kezinde «atopııalyq dermatıt» dıagnozy qoıylǵan adamdar bar. Biraq, olar dárigerdiń nusqaýyn oryndamady: dıetany ustanbady, sońyna deıin emdelmedi jáne eresek kezinde osy aýrýmen ómir súre berdi. Keıinirek, bul fonda teriniń qurǵaýy, qatty qyshý damıdy, aýrý asqynyp, qaterli isikke, ıaǵnı obyrǵa aınalady», - deıdi dáriger.
Aıtýynsha, teri isigi kóbinese obyraldy aýrýlardyń asqynýynan paıda bolady. Sondyqtan moıynǵa, arqaǵa shyqqan meńder, papıllomalar men súıelderdi mindetti túrde alyp tastatý kerek.
«Eger jeke kosmetologııalyq kabınette dermatokosmetolog jumys istese, ol alyp tastaýǵa quzyretti. Joıý úshin suıyq azot, lazer krıoterapııa kimniń qandaı tehnıkany ıelenetinine baılanysty qoldanylady. Protsedýradan buryn AITV-ǵa qan taldaýyn alý kerek», - dep qosty dáriger.
Dáriger kúnde kóp júrýge bolmaıtynyn tilge tıek etti. Sebebi, kún sáýlesi túrli teri aýrýlaryn týdyrady.
«Tańerteńgi saǵat 10.00-den 12.00-ge deıingi kún sáýlesi qaýipti. Qysta jáne jazda kúnnen qorǵaıtyn jaqpamaı qoldanǵan jón. Dárihanadan sertıfıkattalǵan ónimderdi satyp alý qajet, al kremdi qurǵaq nemese maıly bolýyna baılanysty teriniń túrine qaraı tańdaýǵa bolady», - dedi Janna Ahmetova.
