Teri buıymdaryn tańbalaýdyń arqasynda ımporttaýshylardyń sany 30%-ǵa ósti – Baqyt Sultanov
«Eýrazııalyq ıntegratsııanyń negizgi basymdyqtarynyń biri – taýarlardyń erkin jáne zańdy aınalymyn, teńdestirilgen saýda men adal básekelestikti qamtamasyz etý baǵyttarynda úılestirilgen saıasat júrgizý. 2019 jyly Qazaqstan Eýrazııalyq ekonomıkalyq odaq aýmaǵynda taýarlardy sáıkestendirý quraldarymen tańbalaý týraly kelisimdi ratıfıkatsııalady. Kelisim normalaryn oryndaý sheńberinde Qazaqstan Eýrazııalyq ekonomıkalyq komıssııanyń teri buıymdaryn, aıaq kıim taýarlaryn, ıissýlardy, shınalar men rezeńke tystardy tańbalaý jónindegi negizgi sheshimderine qosyldy. Ashyq úsh kezeńdi konkýrs ótkizý arqyly Taýarlardy tańbalaý men olardyń qadaǵalanýynyń biryńǵaı operatory aıqyndaldy», - dedi Baqyt Sultanov Úkimet otyrysynda.
Mınıstr qazirgi eki jyldyq pılottyq jobalardyń nátıjesinde elimizde tabıǵı teriden jasalǵan buıymdardy 2019 jyldyń 1 naýryzynan, al temeki ónimderin bıylǵy jyly 1 qazannan bastap mindetti túrde tańbalaý tártibi engizilgenin málim etti.
«Teri buıymdaryn tańbalaý salyq zańnamasyn buzatyndardy, ıaǵnı jeńildetilgen salyq salý úshin arnaıy salyq rejımi boıynsha shekti mejelik mándi qoldaný maqsatynda kiristeri tómendetilgen salyq tóleýshilerdi anyqtaýǵa múmkindik berdi. Osynyń nátıjesinde, patent negizinde osy qyzmet salasyndaǵy sýbektiler sany 13 ese qysqardy. 2018 jyly taýarlarǵa deklaratsııa resimdegen ımporttaýshylardyń sany aldyńǵy jylmen salystyrǵanda 30%-ǵa ósti, al olardan ımport boıynsha kedendik bajdar men salyqtar túsimderiniń ósimi 40%-dy qurady. Osy qyzmet boıynsha ishki salyqtar túsimderiniń ósimi 1,5 ese artty», - dedi ol.
