Tergeýshiniń esimin keýdesine jazǵan aqtóbeliktiń isinen zańsyzdyq anyqtaldy
AQTÓBE. QazAqparat - Tóbelesten soń ýaqytsha qamaýǵa alynǵan 29 jastaǵy Baýyrjan Ýnerzak tergeýshiniń tegin keýdesine oıyp jazdy. Prokýratýra tergeý kezinde zańsyzdyq anyqtalǵanyn, tóbeleske qatysýshylarǵa izdeý jarııalanǵanyn málimdedi, dep habarlaıdy QazAqparat tilshisi.
Eske sala keteıik, Aqtóbe qalasyndaǵy túngi klýbtardyń birinde tóbeles bolyp, jas jigitterge toqtaý aıtqan Baýyrjan Ýnerzak ýaqytsha qamaýǵa alyndy. Sol kezde ol keýdesine tergeýshiniń tegin jazyp, ashtyq jarııalady. Keıin sot sheshimimen kúdikti ýaqytsha tergeý ızolıatorynan úıqamaqqa shyqty. Buǵan deıin habarlaǵanymyzdaı, kúdiktiniń kelinshegi Arına Nuǵmanova jedel járdem shaqyryp, birneshe ret dárigerdiń kómegine júgingen . Іske prokýratýra aralasyp, tergeý jumystarynan zańsyzdyq anyqtady.
«Toppen buzaqylyq jasaǵany úshin Qylmystyq kodekstiń «Buzaqylyq» babynyń 2- tarmaǵy boıynsha Baýyrjan Ýnerzakqa qatysty is sotqa jiberildi. Aqtóbe qalasynyń prokýratýrasy dálel bolmaǵan soń kúdiktige qatysty is-áreketti Qylmystyq kodekstiń «Buzaqylyq» babynyń 3-tarmaǵyna aýystyrý týraly qaýlynyń kúshin joıdy. Tergeý kezinde anyqtalǵan zańsyzdyqtardy joıýǵa usynys berildi. Qylmystyq iske qatysy bar ózge kúdiktiler bólek óndiriske alynyp, olarǵa izdeý jarııalandy»,- dep habarlaıdy Aqtóbe oblysy prokýratýrasynyń apparat jetekshisi Jasulan Dáýlembaev.
