Tergeýshiler Boeing qasaqana qulatylýy yqtımal degen boljam aıtýda
ASTANA. QazAqparat - Sońǵy málimetter boıynsha, Úndi muhıtyna qulaǵan Malaysia Airlines áýekompanııasynyń joǵalǵan ushaǵy qasaqana qulatylýy múmkin. Tergeýshiler atalmysh nusqany tekserýde, dep habarlaıdy Daily Telegraph tergeý amaldaryna qatysyp júrgen derekkózge silteme jasap.
Basylymnyń atap ótkenindeı, laınerdiń ishinde kenetten paıda bolǵan órt nemese júıedegi aqaýlar onyń qulaýyna sebep bola almaıdy. Derekkózderdiń málimetteri boıynsha, qolda bar aqparattardy taldaý barysynda ushaq joǵalar aldynda «orynsyz» qımyldarǵa boı aldyrmaǵan.
«Bul laıner bortynda bolǵan, jospary aıqyn adamnyń ádeıi jasalǵan is-áreketi», - deıdi basylym derekkózi.
Degenmen, tergeýge qatysyp júrgen sheneýnik atalǵan is-áreketke túrtki bolǵan sebepterdi ashyp aıta almady. Sonymen qatar, onyń aıtýynsha, tergeýdiń bul nusqasyn Malaızııa bıligi áli rastaǵan joq.
Aıta keteıik, Malaızııa premeri Nadjıb Razak birneshe apta boıy izdestirilgen Boeing ushaǵy Úndi muhıtyna qulaǵandyǵyn málim etti. «Boıng 777» ushaǵy 8 naýryz kúni Ońtústik Qytaı teńiziniń ústinde joǵalyp ketken bolatyn. Ony izdeý jumystaryna álemniń jıyrmadan astam eli jumyldyryldy.
