Tergeýshi men kedenshiniń úıinen mıllıondaǵan teńgeniń parasy tabyldy
Agenttiktiń resmı ókili Nurlan Jaxınniń aıtýynsha, Shyǵys Qazaqstan oblysy boıynsha Memlekettik kirister departamentiniń qyzmetkerleri paramen ustalǵan. Olar eki jyl boıy zańsyz syıaqy alyp kelgen. Bir kásipker 2016-2018 jyldar aralyǵynda Qytaıdan taýar tasyǵan. Sonyń bárin kedergisiz ákelgeni úshin ekonomıkalyq qylmystardy tergeý qyzmetiniń asa mańyzdy ister boıynsha aǵa ofıtserine jáne Maıqapshaǵaı keden beketiniń bas mamanyna jalpy somasy 40 myń AQSh dollary kólemindegi parany júıeli túrde berip otyrdy.
"Kúdiktilerdiń keńseleri, turǵylyqty jerleri men kólikterin tintý kezinde 13 mln teńgeden astam shetel valıýtasy anyqtaldy. Qazirgi kezde úsh adam qamaýǵa alyndy. Tergeý sharalary júrip jatyr", - dedi N.Jaxın Astanada ótken baspasóz máslıxatynda