Tergeýshiden Bas prokýrorǵa deıin: Qaırat Qojamjarovtyń ómirbaıany týraly ne bilemiz
ASTANA. KAZINFORM – Búgin elimizdiń Bas prokýratýrasy Qaırat Qojamjarovqa qatysty sotqa deıingi tergeý bastalǵanyn habarlady. Ol laýazymdyq ókilettigin asyra paıdalandy jáne ártúrli kezeńde qylmystyq jolmen alynǵan aqshany zańdastyrdy degen kúdikke ilindi. Sybaılas jemqorlyqqa qarsy ulttyq bıýronyń burynǵy tóraǵasy jáne burynǵy Bas prokýror nesimen este qaldy? Búgingi materıalda osy týraly baıandamaqpyz.
Qaırat Qojamjarov 1965 jyldyń 24 naýryzynda Jambyl oblysynda dúnıege kelgen. 1982 jyly Almatydaǵy respýblıkalyq fızıka-matematıka mektep-ınternatyn bitirgen. 1987 jyly A. Jdanov atyndaǵy Lenıngrad memlekettik ýnıversıtetin «zańger» mamandyǵy boıynsha aıaqtaǵan.
Ol 1987-1996 jyldary prokýratýra organdarynda qyzmet atqarǵan. 1992 jyly «Qazaqstan prokýratýrasynyń úzdik tergeýshisi» ataǵyn alǵan.
1996-1999 jyldary keden organdarynda, sonyń ishinde Qorǵas kedeninde jumys istegen. 1999-2001 jyldary salyq polıtsııasynda qyzmet etti. 2001-2012 jyldary qarjy polıtsııasy organdarynda túrli laýazymdardy atqarǵan.
Ár jyldary Aqtóbe oblysyndaǵy ekonomıkalyq jáne sybaılas jemqorlyq qylmystarymen kúres departamentin basqardy, Ekonomıkalyq jáne sybaılas jemqorlyq qylmystarymen kúres agenttigi tóraǵasynyń orynbasary boldy, al 2008-2012 jyldary atalǵan vedomstvonyń tóraǵasy qyzmetin atqardy.
2012-2013 jyldary Q. Qojamjarov Aqmola oblysynyń ákimi, 2013-2014 jyldary – QR Prezıdentiniń kómekshisi, Qaýipsizdik keńesiniń hatshysy boldy.
Odan keıingi jyldary memlekettik organdarda basshylyq qyzmetter atqardy:
• Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy (2014-2015, 2016-2017 jj.);
• Sybaılas jemqorlyqqa qarsy is-qımyl ulttyq bıýrosynyń tóraǵasy (2015-2016 jj.);
• Qazaqstan Respýblıkasynyń Bas prokýrory (2017-2019 jj.).
2019 jyly 19 naýryzda Q. Qojamjarov QR Parlamenti Senatynyń depýtaty boldy. Bul ókilettilik 2023 jyldyń qańtarynda toqtatyldy.
Sonymen birge Qaırat Qojamjarov — qarjy polıtsııasynyń general-maıory, «Dańq» ordeniniń I jáne II dárejelerimen, birneshe medalmen marapattalǵan, «Qazaqstannyń eńbek sińirgen bilim berý isiniń qyzmetkeri» tósbelgisin alǵan. Úılengen. Úsh uly men bir qyzy bar.
Buǵan deıin Bas prokýratýra Qaırat Qojamjarovtyń «Qorǵas isine» qatysy baryn rastaǵan edi. Ol kezde qarjy polıtsııasy qylmystyq is qozǵap, quqyq qorǵaý organdarynyń birqatar qyzmetkerin, kedenshiler men kásipkerlerdi jaýapqa tartqan bolatyn.
Eske sala ketsek, Almaty oblysyndaǵy keden beketterinde iri kólemdegi urlyq derekteri týraly Qarjy polıtsııasy 2011 jyldyń sońynda habarlaǵan edi. Ol jerde 100-den astam adamnan turatyn uıymdasqan qylmystyq top áreket etken.
Qarjy polıtsııasynyń málimetinshe, bul qylmystyq toptyń jumysyna qylmystyq qurylymdardyń ókilderimen birge quqyq qorǵaý organdarynyń jekelegen laýazymdy tulǵalary da tartylǵan. Olar topty qarjylaı syıaqy úshin qoldap otyrǵan.