Tergeýdi memlekettik tilde júrgizse, sot isterin qazaq tilinde qaraýǵa qaýqarly sýdıalar jetkilikti - B. Beknazarov
TANA. 22 qyrkúıek. QazAqparat /Rýslan Ǵabbasov/ - Tergeýdi memlekettik tilde júrgizse, sot isterin qazaq tilinde qaraýǵa qaýqarly sýdıalar jetkilikti.
Bul týraly búgin Astanada «Sot isin memlekettik tilde júrgizýdiń ózekti máseleleri» taqyrybynda ótken dóńgelek ústelde Joǵarǵy Sot Tóraǵasy Bektas Beknazarov málim etti.
«Qazaqstan Respýblıkasynyń is júrgizý zańnamasyna sáıkes, sot isin memlekettik tilde júrgizýge sýdıalardyń áleýeti tolyq jetedi. Qazirgi ýaqytta jumys istep júrgen 1 myń 995 sýdıanyń 1 myń 570-i, ıaǵnı 75 paıyzy sot isterin memlekettik tilde qaraı alady»,-dedi Joǵarǵy Sot Tóraǵasy. Respýblıka sýdıalarynyń arasynda qazaq tilin bilmeıtinder 213 adam ǵana eken.
«Demek, halyq sotqa qazaq tilinde júginetin bolsa, nemese ókiletti organdar tergeýdi memlekettik tilde júrgizse, barlyq óńirlerde sot isterin qazaq tilinde qaraýǵa qaýqarly sýdıalar barshylyq jáne jetkilikti»,-dedi ol.
Sonymen qarap otyrsaq, búginde halyqtyń 65 paıyzy, sýdıalardyń 75 paıyzy memlekettik tildi erkin meńgergen. «Al is júzinde qazaq tilinde qaralatyn sot isteriniń sany 25 paıyzdan aspaıdy»,-dedi B. Beknazarov.
