Tergeý tıimdiligin arttyrý úshin ІІM-de qylmystyq zańnama jetildiriledi
ASTANA. KAZINFORM — Іshki ister mınıstri Erjan Sadenov belgilegen negizgi baǵyttardyń biri — tergeý tıimdiligin arttyrý jáne azamattardyń quqyqtaryn qorǵaýdy kúsheıtý. ІІM-de ótken semınar-keńes osy maqsattardy júzege asyrýǵa baǵyttaldy. Jıynda vedomstvo basshylyǵy Májilis depýtatymen jáne ǵalymdarmen birlesip, jańa QK men QPK-ni ázirleý máselelerin talqylady. Bul týraly Polisia.kz jazdy.
ІІM tehnologııalyq jańalyqtardy júıeli túrde engizip kele jatyr. Keńestiń aldynda «Vıdeo ND», E-AYGAQZAT kesheni jáne elektrondyq qylmystyq is júrgizý júıesine jasandy ıntellektini ıntegratsııalaý sııaqty birqatar tsıfrlyq jobalar tanystyryldy. Bul tsıfrlyq sheshimder tergeý protsesterin ońtaılandyrýǵa, sondaı-aq atqarylatyn jumystardyń sapasyn arttyrýǵa kómektesedi. Kirispe sózinde Іshki ister mınıstriniń orynbasary Sanjar Ádilov quqyqtyq júıeni damytýdyń qazirgi kezeńi zańnamanyń neǵurlym turaqty formalaryna kóshýdi talap etetinin atap ótti.
— Tergeý tıimdiligin arttyrý — bizdiń ortaq maqsatymyz. Sondyqtan jańa Qylmystyq jáne Qylmystyq-protsestik kodeksterdi qabyldaýdy keıinge qaldyrýǵa bolmaıtyn obektıvti qajettilik dep sanaımyz. Іshki ister mınıstrligi zańnamany jetildirýge baǵyttalǵan kez kelgen kásibı dıalogqa ashyq, — dedi ol.
Jıyn barysynda zańnamany júıeli reformalaý máseleleri qaraldy: turaqty quqyqtyq normalardy qalyptastyrý, azamattardyń quqyqtaryn qorǵaý men protsestik ınstıtýttardy ońtaılandyrý arqyly tergeýdiń zamanaýı tásilderin engizý talqylandy. Májilis depýtaty Abzal Quspan, professorlar Marat Qoǵamov, Arstan Ahpanov jáne basqa da qatysýshylar baıandamalarynda reformaǵa qatysty óz pikirlerin bildirdi. Kezdesýdi qorytyndylaı kele, ІІM Tergeý departamentiniń bastyǵy Samat Aısov aldaǵy jumystyń praktıkalyq baǵyttaryn aıqyndap berdi.
— Búgingi semınar-keńes quqyq qoldaný tájirıbesiniń ózekti máselelerin jáne QK men QPK normalaryn júıeli túrde jetildirýdi talqylaıtyn mańyzdy alańǵa aınaldy. Kezdesý qorytyndysy boıynsha tergeý jumysynyń tıimdiligin arttyrýǵa jáne azamattardyń quqyqtaryn qorǵaýdy kúsheıtýge baǵyttalǵan usynystar ázirlenedi, — dep atap ótti ol.
Mundaı is-sharalardy ótkizý qoǵamnyń qazirgi suranystaryna jáne quqyqtyq memleket qaǵıdattaryna saı keletin tıimdi sheshimderdi qabyldaýǵa múmkindik beredi.
Buǵan deıin Іshki ister mınıstrliginde ótken keńeıtilgen alqa otyrysynda qylmys 9%-ǵa tómendedegeni habarlandy.
