Tergeý sýdıasy laýazymy engiziledi - QR Bas prokýratýrasy
ASTANA. 21 qańtar. QazAqparat - Jańa redaktsııadaǵy Qylmystyq is júrgizý kodeksi jobasynda «tergeý sýdıasy» laýazymyn engizý kózdeledi. Búgin Májilistiń Zańnama jáne sot-quqyqtyq reformalar komıtetiniń keńeıtilgen otyrysynda Iogan Merkel osylaı málim etti.
Eske salaıyq, komıtet otyrysynda Qylmystyq is júrgizý kodeksiniń jańa redaktsııasy talqylanǵan bolatyn. QR Bas prokýrorynyń birinshi orynbasary Iogan Merkeldiń aıtýynsha, tergeý sýdıasy - sotqa deıingi is júrgizý barysynda osy Kodekste kózdelgen ókilettikterdi júzege asyrýshy birinshi satydaǵy sot sýdıasy retinde aıqyndalǵan. Sonymen qatar, tergeý sýdıasy negizinen prokýrorlarmen birge Qazaqstan azamattarynyń quqyqtaryn qorǵaýdy qadaǵalaıdy. «Tergeý sýdıasy kúzetpen ustaýǵa sanktsııa berý, úı qamaqqa otyrǵyzý, medıtsınalyq mekemege kúshpen qamaý jáne taǵy basqa sharalardyń qanshalyqty zańdy ekendigin tekseredi. Sondaı-aq, tergeý sýdıasy aýyr jáne asa aýyr qylmystardan bólek ister boıynsha kepilzattyń kólemin anyqtaı alady. Al kepilzat jasalǵan boıda tergeý oqshaýlaǵyshynyń basshysy kúdikti azamatty bosatýy shart. Ol úshin sottyń qosymsha sheshimi kerek emes», - deıdi Iogan Merkel. Alaıda adam ólimi, uıymdasqan qylmys jáne lańkestikke qatysy bar azamattardyń kepilzaty qabyldanbaıdy. Toqtala ketetin jaıt, tergeý sýdıasy birinshi satydaǵy sot sýdıalarynyń jınalysynda osy sot sýdıalarynyń qatarynan saılanady.
