Tergeý: Sınaıdaǵy meshitke jasalǵan shabýylǵa DAISh-tyń qatysy bar
ASTANA. QazAqparat - Ótken jumada Mysyrdyń Sınaı túbeginde ornalasqan meshitke jasalǵan jan túrshigerlik shabýyldy aldyn ala tergep-tekserý oǵan DAISh lańkestik tobynyń qatysy baryn rastaıdy. Bul jaıly Mysyr kúshtik qurylymdaryndaǵy derekkózderge silteme jasap TASS habarlaıdy.
«Aldyn ala tergep-tekserý shabýyldyń DAISh lańkesteri tarapynan bolǵanyn rastaıdy», - delingen habarlamada.
Juma kúni Soltústik Sınaı provıntsııasynyń astanasy ál-Arısh qalasyna (Gaza sektorynan 30 km jerde ornalasqan) qarasty Bır-ál-Ábd eldi mekenindegi ár-Raýda meshitinde juma namaz kezinde jan túrshigerlik terakt boldy. 30-ǵa jýyq lańkes jarylǵysh zatty qulshylyq etip jatqan adamdardyń ortasyna laqtyryp, jaryp jibergen. Artynsha meshitten qashyp shyqpaq bolǵandarǵa qaraı oq jaýdyrǵan. Terakt saldarynan 305-ten astam adam, sonyń ishinde 27 bala qaza taýyp, 128 adam jaralandy.
Teraktini resmı túrde eshkim moınyna almaǵanmen, Mysyr tarapy shabýyldy DAISh-ke adal bolýǵa ant-sý ishken «Ánsar Beıt ál-Maqdıs» («Ierýsalım jaqtastary») lańkestik toby uıymdastyrǵanyna kúmán keltirmeıdi. Atalǵan lańkestik top qazirgi kezde óz atyn «Vılaıet Sınaı» («Sınaı provıntsııasy») dep ózgertip alǵan. Mysyrda sońǵy jyldary uıymdastyrylǵan kóptegen lańkestik shabýyldarǵa dál osy toptyń qatysy bar.
