Tergeý organdarynyń J.Dosqalıevti qamaýda ustaý merzimin uzartýǵa múmkindikteri bar - Joǵarǵy sot ókili
ASTANA. Qazannyń 27-si. QazAqparat /Aıdar Ospanalıev/ - Tergeý organdary eki aı ishinde Densaýlyq saqtaý mınıstrliginiń burynǵy basshysy Jaqsylyq Dosqalıevtiń isi boıynsha tergeý amaldaryn tolyqtaı aıaqtaýy qajet.
Olaı bolmaǵan kúnde quzyrly organdar sottan J.Dosqalıevti qamaýda ustaý merzimin uzartý týraly usynys jasaı alady. Bul týraly búgin jýrnalıstermen kezdesýi barysynda Joǵarǵy sottyń Qylmystyq isterdi baqylaý alqasynyń tóraǵasy Aqyltaı Qasymov málim etti.
Onyń sózine qaraǵanda, tergeý organdary J.Dosqalıevti qamaýda ustaý merzimin uzartý jóninde sot organdaryna qoldaý hat túsiretin bolsa, olarǵa ózderiniń nelikten bul áreketke barǵandaryn, jaǵdaıdyń ne úshin bulaı qalyptasqandyǵyn túsindirýi qajet bolady. «Olar óz isterinde qandaı kemshilik jiberip, neni sońyna jetkize almaı qalǵandyqtary jóninde tolyq esep berýleri qajet», - A. Qasymov.
